मुंबई (वृत्तसंस्था) बॉलिवूड अभिनेता शाहरुख खानच्या मुलाच्या ड्रग्स प्रकरणावर आज कोर्टात सुनावणी होणार आहे. तत्पूर्वी एनसीबीच्या हाती काही चॅट्स लागले आहेत. त्यामुळे आर्यन खानच्या अडचणी वाढताना दिसत आहेत. यामध्ये आर्यनने एका नवोदित अभिनेत्रीसोबत ड्रग्ससंबंधी चॅट केल्याचं समोर आलं आहे.
आर्यन खानला क्रूझ रेव्ह पार्टी प्रकरणी २ ऑक्टोबरला अटक करण्यात आली असून सध्या तो जेलमध्ये आहे. आर्यनच्या जामिनावर सुनावणी करणाऱ्या विशेष एनडीपीएस न्यायालयाने गेल्या सुनावणीत जामिनावरील निर्णय राखून ठेवला होता. दरम्यान एनसीबीने जामीनाच्या सुनावणीआधी आर्यन खानने एका अभिनेत्रीसोबत ड्रग्जसंबंधी चॅटिंग केल्याची माहिती कोर्टात दिली आहे. एनसीबीने हे संभाषण कोर्टात सादर केलं आहे. गेल्या सुनावणीत एनसीबीने कोर्टात ही माहिती दिली आहे.
एनसीबीने आर्यन खानच्या मोबाइलमधील चॅटिंग तपासलं असून याआधीही अनेक संभाषणांचा उल्लेख केला आहे. दरम्यान यावेळी आर्यन खानने एका नवोदित अभिनेत्रीसोबतही ड्रग्जसंबंधी चॅट केलं होतं असं समोर आलं आहे. २ ऑक्टोबरला झालेल्या क्रूझ पार्टीतल्या ड्रग्जसंबंधी दोघांमध्ये बोलणं झालं होतं. या अभिनेत्री आणि आर्यन खानमध्ये अनेकदा ड्रग्जवरुन चॅटिंग झालं आहे.
दरम्यान, जामीन मंजूर झाल्यास कागदोपत्री कारवाईनंतर आर्यन खानची सुटका होऊ शकते. मात्र, अर्ज नामंजूर झाल्यास आर्यन खानचा जेलमधील मुक्काम वाढणार आहे. जामीन नाकारल्यास आर्यन खानचे वकील हायकोर्टात जाऊ शकतात.
