चोपडा (प्रतिनिधी) शहरातील रामपुरा, पारधी वाडा येथील रहिवासी असलेला संदीप निळकंठ चव्हाण (वय २४) याचा घराजवळच नातेवाईकांकडे सुरू असलेल्या धार्मिक कार्यक्रमात नाचत असताना अचानक चक्कर येऊन जमिनीवर पडल्याने दुर्दैवी मृत्यू झाल्याची घटना दि १८ रोजी पहाटे ३.३० वाजेच्या सुमारास घडली आहे.
मयत संदीप चव्हाण याच्या काकांकडे कुलदैवताचा नवसाचा धार्मिक कार्यक्रमाचे आयोजन केले होते. यात रात्रभर धार्मिक गाण्यांचा कार्यक्रम सुरू होता. यावेळी दि १८ रोजी पहाटे ३.३० वा. गाण्यांवर नाचत असताना संदीपला चक्कर आल्या तो जमिनीवर पडला. त्याला तात्काळ चोपडा उपजिल्हा रुग्णालयात दाखल करण्यात आले. परंतू त्याला डॉक्टरांनी मृत घोषित केले. मृत्यूच्या काही तासांपूर्वी संदीपने चुलत भावाचा लग्नाचा वाढदिवस केक कापून साजरा केला होता.
संदीपच्या अचानक जाण्याने मित्रपरिवारासह नातेवाईकांमध्ये हळहळ व्यक्त केली जात आहे. मयत संदीपचे चोपडा उपजिल्हा रुग्णालयात शवविच्छेदन करण्यात येऊन दि १८ रोजी दुपारी १२.३० वाजेच्या सुमारास शोकाकुल वातावरणात अंत्यसंस्कार करण्यात आले. त्याच्या पश्चात आई, वडील, भाऊ, बहीण असा परिवार आहे.
