वर्धा (वृत्तसंस्था) देवळी देवळी तालुक्यातील गिरोली येथील एका वृद्धाची हत्या करून कपातील घरातील कपाटात ठेवलेले पैसे व दागिने चोरी केल्याची घटना घडली होती. स्थानिक गुन्हे शाखेच्या पथकाने अवघ्या काही तासात या घटनेचा उलगडा केलाय. धक्कादायक म्हणजे वृद्धाच्या अल्पवयीन नातवाने दोन मित्रांच्या मदतीने खून करून पैसे चोरून नेल्याची समोर आले आहे. याप्रकरणी तीनही आरोपींना पोलिसांनी रविवारी रात्री अटक केली.
चहा कँटीनवर तिघांनी चोरीचा कट रचला !
मृतकाचा नातू (विधीसंघर्षीत बालक) याचा मित्र मयूर उर्फ महेश गजानन कोडापे (वय १९ रा. सार्वजनिक बांधकाम विभाग, वसाहत, वर्धा), तसेच हर्षल दिलीपराव पारडकर (वय १९ रा. प्राजक्तानगर, वर्धा) यांना पैशाची गरज होती. तिघे महिलाश्रम येथील चहा कँटीनवर एकत्र आले. गिरोली येथे राहणारे आजोबा अरुण डहाके यांच्याकडे भाजीपाला विक्रीचे भरपूर पैसे असतात व आज आजी वर्धेला आली आहे. ते घरी एकटेच आहे, असे सांगितले. तिघांनी चोरीचा कट रचला. दुचाकीने रात्री गिरोली या गावी पोहोचले. आजोबा यांना आवाज दिला. आजोबा (अरुण) यांनी दार उघडताच त्यांच्यावर धारदार शस्त्राने हल्ला करून निर्घृण खून केला.
चोरीच्या पैशाची व दागिन्यांची तिघांनी केली वाटणी !
यानंतर घरातील कपाटात ठेवलेले पैसे व दागिने चोरी केले. त्यानंतर सोबतची बॅग वायगाव, हिंगणघाट रोडवर नेरी गावाजवळ टाकुन वर्धा येथे परत आले. चोरीच्या पैशाची व दागिन्यांची तिघांनी वाटणी करुन घेतली, अशी माहिती पोलिसांना दिली. त्या माहितीच्या आधारावर त्याच्या दोन्ही मित्रांना ताब्यात घेण्यात आले. स्वतंत्रपणे चौकशी केली असता तिघांनीही गुन्हा केल्याची कबुली दिली. पुढील कारवाईकरिता रविवारी रात्री आरोपींना देवळी पोलिसांच्या ताब्यात देण्यात आले.
उधारी फेडण्यासाठी केले कृत्य !
अटक करण्यात आलेल्या तीनही आरोपींना पैशाची गरज होती. उधारी फेडण्यासाठी आरोपींनी चोरीचा कट आखला होता. चोरी केल्यानंतर आरोपींनी पैसे व दागिने चोरी करून सोबत असलेली बॅग नेरी गावाजवळ फेकून देत वर्धा येथे परत आले. वर्ध्यात आल्यावर चोरीच्या पैशांची व दागिन्यांची तिघांनी वाटणी केल्याचे आरोपींनी पोलिसांना तपासादरम्यान सांगितले. पुढील कारवाईसाठी दोघांना देवळी पोलिसांच्या ताब्यात देण्यात आले आहे.
या पथकाने केला खुनाचा उलगडा !
ही कारवाई पोलिस अधीक्षक नुरुल हसन, अपर पोलिस अधीक्षक डॉ. सागर कवडे यांच्या मार्गदर्शनात उपविभागीय पोलिस अधिकारी संजय पवार, पोलिस निरीक्षक संजय गायकवाड, पोलिस निरीक्षक भानुदास पिदूरकर, सहायक पोलिस निरीक्षक संतोष दरेकर, दीपक वानखेडे, पोलिस उपनिरीक्षक अमोल लगड, राम खोत, पोलिस अंमलदार संतोष दरगुडे आदींनी केली.
