पहूर, ता. जामनेर (प्रतिनिधी) प्लग आणि वायरची जोडणी करताना विजेचा शॉक लागून तरुणाचा मृत्यू झाल्याची दुर्घटना पहूर येथे २२ रोजी सकाळी १० वाजेच्या सुमारास घडली.
प्लग आणि वायरची जोडणी करतांना लागला शॉक !
पहूर येथील शिवनगर भागात राहणाऱ्या दीपक सुरेश वारुळे हा तरुण प्लग आणि वायर यांची जोडणी करत होता. या वेळी त्यास विजेचा जबर धक्का बसल्याने त्याची शुद्ध हरपली. शेजारील रहिवाशांनी त्यास तातडीने उपचारार्थ पहर ग्रामीण रुग्णालयात हलवले, पहर ग्रामीण रुग्णालयात डॉ. नजमुद्दीन तडवी, डॉ. रुपाली पाटील, परिचारिका योगिता नागरे, वैशाली पाटील यांनी त्याला वाचवण्यासाठी शर्थीचे प्रयत्न केले. उपचारासाठी जळगावला नेत असताना वाटेतच त्याची प्राणज्योत मालवली. त्यानंतर ग्रामीण रुग्णालयात शवविच्छेदन करण्यात आले.
तळहाताच्या फोडाप्रमाणे मुलाचा केला सांभाळ !
दोन वर्षांचा असतानाच दीपकचे पितृछत्र हरपले होते. पतीच्या निधनानंतर मातेने तळहाताच्या फोडाप्रमाणे मुलाचा सांभाळ केला. मोठ्या हिमतीने त्यास शिकविले. दीपक आपल्या कुटुंबाचे भाग्य उजळविणार, असे आईचे स्वप्न होते. मात्र, दीपकच्या निधनानंतर विधवा आईवर दुःखाचा डोंगर कोसळला आहे. सायंकाळी ६ वाजता शोकाकुल वातावरणात त्याच्यावर अंत्यसंस्कार करण्यात आले. मृत दीपक वारुळे याच्या पश्चात विधवा आई व विवाहित बहीण असा परिवार आहे. याप्रकरणी पहर पोलीस ठाण्यात अकस्मात मृत्यूची नोंद करण्यात आली आहे.
