जळगाव (प्रतिनिधी) माहिती अधिकार कार्यकर्ते दिनेश भोळे यांनी पुन्हा एकदा आरोग्य विभागाने केलेल्या साहित्याच्या खरेदीतील घोळ उघड केला आहे. यानुसार अवघ्या ४५ हजाराच्या डिजिटल थर्मा मीटरसाठी तब्बल साडेचार लाखाची मान्यता देण्यात आल्याचा प्रकार उघड झाला आहे. दरम्यान, याबाबतची सर्व कागदपत्रे नियोजन विभागातून माहिती अधिकारात मिळवली आहेत. प्रथमदर्शनी हा अपहार वाटत असून सोमवारी जिल्हाधिकारी यांच्याकडे याबाबत श्री. भोळे तक्रार करणार आहेत.
‘यांनी’ दिली खरेदीला तांत्रिक मान्यता
कोविड उपाययोजनांसाठी जिल्ह्यातील आरोग्य यंत्रणेला मार्च २०२० मध्ये ३० डिजिटल थर्मामीटरची खरेदी करण्यासाठी जिल्हा नियोजन समिती आणि संबंधित यंत्रणांनी १५०० रुपये प्रति नग या प्रमाणे मान्यता दिली. त्यानुसार ३० थर्मामीटरसाठी एकूण ४५ हजार रुपयांच्या खर्चालाच प्रशासकीय आणि तांत्रिक मान्यता देणे गरजेचे होते. मात्र, त्याऐवजी ४ लाख ५० हजार रुपयांना मान्यता देण्यात आल्याचे आता माहिती अधिकारात मिळालेल्या कागदपत्रातून उघड होत आहे. विशेष म्हणजे जिल्हाधिकारी, जिल्हा परिषदेचे मुख्य कार्यकारी अधिकारी, जिल्हा आरोग्य अधिकारी आणि जिल्हा शल्यचिकित्सक यांनी या खरेदीला तांत्रिक मान्यता दिली आहे.
एका शून्याने असा केला घोळ
जिल्हा रुग्णालयाकडून जिल्हा शल्यचिकित्सक यांनी २४ मार्च २०२० रोजी जिल्हाधिकाऱ्यांना ३० डिजिटल थर्मामीटरची आवश्यकता असल्याचे आणि त्यासाठी प्रती १५०० रुपयांप्रमाणे खरेदीसाठी निधी वितरित करण्यात यावा, असे म्हटले होते.त्याच्यात दर देखील नमूद करण्यात आले होता. त्यानुसार १५०० ला ३० ने गुणले तर किंमत ४५ हजार रुपये एवढीच होते. मात्र या खर्चाला तांत्रिक मान्यता मिळाली तेव्हा त्यात ४ लाख ५० हजारांचा उल्लेख आहे. २६ मार्च रोजी तत्कालीन जिल्हाधिकारी आणि जिल्हा नियोजन समितीचे सदस्य, सचिव यांनी पत्र देऊन त्याला प्रशासकीय मान्यतेचा कार्यालयीन आदेश आणि निधी वितरणाचा आदेश दिला आहे. दरम्यान, या डिजिटल थर्मामीटरचे दर जास्त असल्याने काही दिवसांनी ही संपूर्ण खरेदी प्रक्रियाच रद्द करण्यात आली होती. त्यामुळे कुणालाही पैसे देण्यात आले नाहीत, अशी प्रतिक्रिया माध्यमांशी बोलतांना तत्कालीन जिल्हा शल्य चिकित्सक डॉ. एन. एस. चव्हाण यांनी दिली आहे.
