जळगाव (प्रतिनिधी) धरणगाव तालुक्यातील पाळधी येथील दुकान फोडून मोबाईल चोरी करणाऱ्या संशयित आरोपीला स्थानिक गुन्हे शाखेच्या पथकाने आज सापळा रचून गजाआड केले आहे.
जिल्हयांत घरफोडी, दुकान फोडोचे गुन्हयांत वाढ झाल्याने पोलीस अधीक्षक एम. राज कुमार, चाळीसगाव अपर पोलीस अधीक्षक रमेश चोपडे, यांनी एलसीबीचे वरिष्ठ पोलीस निरीक्षक किसन नजनपाटील यांना गुन्ह्यांची उकल करण्याबाबत सूचना केल्या होत्या. त्यानुसार श्री, नजनपाटील यांना दि. १३ नोव्हेंबर रोजी गुप्त बातमीदार मार्फत बातमी मिळाली की, कजगाव ता. भडगाव येथील मिथुनसिंग मायासिंग बावरी (रा. कजगाव ता. भडगाव) याने पाळधी ता, धरणगाव येथील एका दुकानाचे कुलूप तोडून त्यातील मोबाईल व इतर वस्तु चोरी केल्या आहेत. त्यात रियलमो कंपनीचा मोबाईल हॅण्डसेट त्याच्या ताब्यात असून तो मोबाईल वापरत असल्याची माहिती मिळाली.
यानंतर श्री. नजनपाटील यांनी स्थानिक गुन्हे शाखेचे अंमलदार पोहेको लक्ष्मण अरुण पाटील, पोना रणजित अशोक पाटील, पोना किशोर राठोड, पोका विनोद सुभाष पाटील, पोका मुरलीधर सखाराम बारी यांचे पथक तयार केले. यानंतर या पथकाला त्यांनी कजगाव येथे रवाना केले. त्यानंतर सापळा रचून संशयित आरोपी मिथुनसिंग मायासिंग बावरी याला ताब्यात घेतले. बावरीविरुद्ध धरणगाव पोलीस स्टेशन गुर नं. २२६ २०२२ भादवि ४६९,३८० प्रमाणे गुन्हा दाखल होता. त्याच्याकडून गुन्हयांतील चोरी झालेला ५,५००/- रु. किमतीचा १ मोबाईल हेण्डसेट मिळून आल्याने सदर मोबाईल हॅण्डसेट बाबत आरोपीस अधिक विचारपुस केली असता त्याने पाळधी गावातील एक दुकानाचे कुलूप तोडून चोरी केल्याची कबुली दिली. यामुळे या गुन्हयांतील जप्त केलेला मोबाईल हॅण्डसेट व संशयित आरोपी मिथुनसिंग बावरी यास पुढील तपास कामी धरणगाव पोलिसांच्या ताब्यात देण्यात आले आहे.
