जळगाव (प्रतिनिधी) शासकीय वैद्यकीय महाविद्यालय व रुग्णालयातील शरीरक्रियाशास्त्र विभाग प्रमुख प्रा. डॉ. चंद्रकांत डांगे यांनी पुन्हा एकदा वर्तणूक ‘बेशिस्त’ करत ‘डीन’ यांच्या खुर्चीचा ताबा मिळवीत टेबलावर पाय ठेवून बसले. याप्रकरणी डॉ. रामानंद यांनी जिल्हापेठ पोलिस ठाण्यात तक्रार दिली आहे.
रविवारी सकाळी १० वाजेच्या सुमारास मद्यधुंद अवस्थेत डॉ. चंद्रकांत डांगे डाॅ. रामानंद यांच्या दालनात आले. ‘तुम्ही कोण आहात, तोंडाला लावलेले मास्क काढा, मी तुम्हाला पाहून घेईन’ अशा भाषेत त्यांनी डॉ. रामानंद यांना दमदाटी केली. डॉ. रामानंद यांच्याशी बराच वेळ हुज्जत घातली. त्यानंतर थेट अधिष्ठाता डॉ. जयप्रकाश रामानंद यांच्या खुर्चीत जाऊन बसले. यानंतर डॉ. रामानंद यांनी जिल्हापेठ पोलिस ठाण्यात डॉ. डांगे यांच्याविरुद्ध तक्रार दिली. पोलिसांनी अदखलपात्र गुन्हा दाखल करत डॉ. डांगे यांना वैद्यकीय महाविद्यालयातून ताब्यात घेतले. त्यानंतर वैद्यकीय तपासणी करून त्यांना समज देऊन सोडण्यात देण्यात आले.
