जळगाव (प्रतिनिधी) दूध संघातील अपहारप्रकरणी दाखल असलेल्या गुन्ह्यात आतापर्यंत शहर पोलिसांनी सहा जणांना अटक केली आहे. यातील रवी मदनलाल अग्रवाल (रा. अकोला) आणि चंद्रकांत मोतीराम पाटील उर्फ सी.एम. पाटील (जळगाव) यांना अटक केल्यानंतर न्यायालयात हजर केले असता दोघांना १९ नोव्हेंबरपर्यंत पोलीस कोठडीत सुनावण्यात आली आहे. दरम्यान, यातील अग्रवाल हे दुध संघातील बी ग्रेडच्या तूपापासून लहान मुलांमध्ये प्रचंड आवडीचे असलेले राजमलाई हे चॉकलेट बनवत असल्याचे समोर आले आहे. विशेष म्हणजे बी ग्रेडचे तूप मानवी आरोग्यासाठी हानिकारक असल्याचे माहित असूनही त्याचा गोरखधंदा सुरु असल्याची धक्कादायक माहिती पोलीस तपासात समोर आली आहे.
चॉकलेट बनवून लहान मुलांसह लोकांचा जीव आणला धोक्यात !
संशयित आरोपी रवि मंदनलाल अग्रवाल हे कैलादेवी कुटीर उद्योग नावाने राजेमलाई चॉकलेटचा व्यवसाय करत होते. ते विठ्ठल रुख्मीणी एजन्सीकडून बी ग्रेड तुप खरेदी करत होते. बी ग्रेडचा वापर Not For Human Use (मानवी वापरास निषिद्ध) असल्याचे त्यांना ते माहीत असूनही त्यांनी ते खरेदी केले. तसेच त्याचा राजेमलाई चॉकलेट बनविण्यासाठी वापर करत होते. संशयित आरोपी मनोज लिमये, हरी पाटील आणि रवि अग्रवाल यांना देखील याबाबतची कल्पना होती. तरी देखील त्यांनी त्याचा वापर करून लहान मुले व लोकांचे जिवन देखील धोक्यात आणले. त्यामुळे पोलीस आता याची सखोल चौकशी करून तपास करून यामागे त्यांच्या व्यतिरिक्त आणखी कुणाचा हात होता, याची सखोल चौकशी करणार आहेत.
कोणतीही पावती दिली जात नव्हती, नातेवाईकामार्फत मिळत असलेले टेंडरही रडारवर !
संशयित आरोपी रवि अग्रवाल याला संशयित आरोपी हरी पाटील यांच्याकडून घेत असलेल्या बी ग्रेड तूपाबाबतची पुर्ण कल्पना असताना देखील बी ग्रेड तूप मोठया प्रमाणात खरेदी करत होते. त्यांना कोणत्याही प्रकारची पावती दिली जात नव्हती. ती का दिली जात नव्हती?, या मागचे कारण काय व हे करण्यास कोण भाग पाडत होते? याचा देखील पोलीस कसून चौकशी करणार असल्याचे कळते. संशयित आरोपी सी.एम.पाटील याचा नातेवाईक किशोर काशीनाथ पाटील हा असल्याची माहिती कळते. विशेष म्हणेज त्याच्याच नावावर विठ्ठल रुख्मीणी एजन्सी घेतली असून सदरची एजन्सी घेण्यामागे त्यांचा उद्देशय काय होता? याचा सखोल तपासही पोलीस करणार असल्याची माहिती सूत्रांनी दिली आहे. तर संशयित आरोपी चंद्रकांत मोतीराम पाटील हे प्रशासक मडंळाचे महत्वाच्या पदावर नेमणुकीस होते. यामुळे त्यांना सदरचे कृत्य करण्यासाठी कोण आदेश देत होता? व त्यांचे इतर साथीदार कोण आहेत?, याचा सखोल तपास देखील पोलीस करणार आहेत. एवढेच नव्हे तर विठ्ठल रुख्मीणी एजन्सीकडून खरेदी केलेले बी ग्रेड तुप देखील जप्त होणार असल्याचे कळते.
जामिन मिळण्यासाठी सहकार्य आणि कोण-कोण घेत होते कमिशन?
सदर गुन्हयातील अटकेतील संशयित आरोपी मनोज लिमये हे जळगाव जिल्हा सहकारी दूध उत्पादक संघाचे जबाबदार अधिकारी असतानाही त्यांनी या गुन्हयातील एका आरोपीसोबत संगणमताने बिलिंगच्या दस्ताऐवजमध्ये फेरफार करून बनावटी दस्तऐवज तयार केले आहेत. तसेच संशयित आरोपी निखील नेहते यांना जामिन मिळण्यासाठी सहकार्य केले असून त्याने असे कोणाचे सांगण्यावरून केले याचा देखील सखोल तपास होणार असल्याचे कळते. धक्कादायक म्हणजे जामीनसाठी कार्यालयाचे कर्मचारी देखील पुरविण्यात आले असून औरगांबाद येथे मा. न्यायालयात वकील यांची नियुक्ती करून दिली. तसेच दूध संघाची गाडी करून गुन्हयात सहकार्य केले असल्याचे कळते. तसेच अपहारचा प्रकार कोणाच्या सांगण्यानुसार केला जात होता? तसेच साक्षीदार यांच्या म्हणण्याप्रमाणे दूध संघात खरेदी विक्री व्यवहारातून लिमये व श्री. पाटील हे कमीशन घेत का? याबाबतही सखोल चौकशी होणार आहे.
