जळगाव (प्रतिनिधी) संपूर्ण जिल्हा एकच मतदारसंघ असल्याचे कारण देत मुक्ताईनगरमध्ये आमदार मंगेश चव्हाण यांच्या उमेदवारी अर्जावर मंदाकिनी खडसेंनी घेतलेली हरकत फेटाळण्यात आली.
काय होती नेमकी हरकत ?
दूध संघाच्या पोटनियमाप्रमाणे प्रत्येक तालुक्यासाठी १५ संचालक, चार राखीव जागांचे संचालक आणि एक कार्यकारी संचालक असे संचालक मंडळ आहे. त्या-त्या तालुक्यातून केवळ त्याच तालुक्याचे कार्यक्षेत्र असलेल्या प्रतिनिधीने उमेदवारी अर्ज करणे अपेक्षित असल्याची बाजू मांडत मंदाकिनी खडसे यांनी मंगेश चव्हाण यांचा उमेदवारी अर्ज बाद ठरवण्याची मागणी केली होती.
जिल्हा एकच मतदारसंघ, निवडणूक निर्णय अधिकाऱ्यांनी फेटाळली हरकत
दूध संघासाठी कोणताही उमेदवार कोणत्याही तालुक्यातून उमेदवारी अर्ज दाखल करू शकतो, अशी बाजू मंगेश चव्हाण यांच्याकडून मांडण्यात आली होती. मंदाकिनी खडसेंचा हरकत अर्ज फेटाळण्यात आला असून, अपील दाखल केले जाण्याची शक्यता आहे.उपविधी क्रमांक १४.२ नुसार तालुकानिहाय निवडलेल्या प्रतिनिधींसाठी मतदारसंघ जिल्हा राहील असे नमूद करण्यात आले आहे. उपविधी १४.२७ नुसार संचालक निवडणुकीसाठी संपूर्ण जिल्हा हा एकच मतदारसंघ राहील असे नमूद आहे. या दूध संघातील उपविधींचा दाखला देत निवडणूक निर्णय अधिकारी संतोष बिडवई यांनी मंदाकिनी खडसेंची हरकत फेटाळून लावत मंगेश चव्हाण यांचा उमेदवारी अर्ज कायम ठेवला आहे.
