जळगाव (प्रतिनिधी) पाचोरा तालुक्यातील एका गावात चर्मकार समाजाच्या १२ वर्षीय अल्पवयीन मुलीवर अत्याचार करणाऱ्या नराधमांना कठोर शासन व्हावे, यासाठी जिल्ह्यातील अनुसूचित जाती – जमातीच्या संघटना एकवटल्या असून मंगळवार दिनांक २४ मे रोजी घटनेच्या निषेधार्थ जिल्हाधिकारी कार्यालयासमोर निदर्शने आंदोलन करण्यात येणार आहे.
पाचोरा तालुक्यातील एका गावात चर्मकार समाजाच्या अल्पवयीन मुलीला गुंगीचे औषध देऊन नराधमांनी सामूहिक अत्याचार केल्याची संतापजनक घटना नुकतीच घडली आहे.या प्रकारचा केवळ निषेध व्यक्त करून चालणार नाही तर यापुढे अनुसूचित जाती – जमातीवर होणारे अत्याचार खपवून घेतले जाणार नाही, असा इशारा देत जिल्ह्यातील दलीत संघटना एकवटल्या आहेत.
आज रविवार दिनांक २२ मे रोजी प्रभात चौकातील शानबाग सभागृहात जिल्ह्यातील आंबेडकरवादी संघटनांची बैठक महाराष्ट्र जनक्रांती मोर्चाचे प्रदेशाध्यक्ष मुकुंद सपकाळे यांच्या अध्यक्षतेखाली तसेच राष्ट्रीय चर्मकार संघटनेचे राष्ट्रीय कार्याध्यक्ष भानुदास विसावे यांच्या प्रमुख उपस्थितीत बैठक संपन्न झाली.
यावेळी मुकुंद सपकाळे यांनी आपले विचार व्यक्त करतांना सांगितले की, देशात व राज्यात अनुसूचित जाती जमातीवर अत्याचार वाढत असताना न्याय मिळवण्यासाठी भांडावे लागते ही शोकांतिका असून सर्व संघटना एकत्रित आल्यास दलीत आदिवासींवर अत्याचार करण्याची कोणाचीही हिम्मत होणार नाही.
राष्ट्रीय चर्मकार समाज संघटनेचे भानुदास विसावे यांनी आपले परखड मत मांडताना सांगितले की,दलीत आदिवासींवर कोणतेही अत्याचार होणार नाही यासाठी मोठा लढा उभारावा लागणार असून आपला दबावगट निर्माण झाल्याशिवाय अत्याचार थांबणार नाहीत.
यावेळी अखिल भारतीय सफाई कामगार संघटनेचे प्रदेश महामंत्री दिलीप चांगरे,प्रा. डॉ.सत्यजित साळवे,संविधान जागर समिती चे संयोजक भारत ससाणे,प्रा.चंद्रमणी लभाणे, कास्ट्राईब संघटनेचे रवींद्र तायडे, जितेंद्र बागरे, संदीप ढंडोरे,लहुजी ब्रिग्रेड चे सुरेश अंबोरे,किशोर डोंगरे,विलास पाटील,दिलीप सपकाळे,पी.आर.आंबेडकर,पांडुरंग बाविस्कर यांनी आपले विचार व्यक्त केले.
बैठकीस ऍड.राजेश गोयर, भगवान बाविस्कर, गलु ठोसर, ज्ञानेश्वर बाविस्कर, साहेबराव अहिरे,संजय सपकाळे,वाल्मीक सपकाळे,नितीन तायडे,राजू मोरे,सुरेश जयराज, पंढरी नेटके,नीलेश बोरा,सुभाष सपकाळे,विजय सुरवाडे,नितीन मोरे,सचिन बिऱ्हाडे,दीपक आदिवाल,महेश बनसोडे,महेंद्र केदारे,कैलास मोरे,संदीप सोनवणे,नितीन सपकाळे यांच्यासह राष्ट्रीय चर्मकार समाज संघटना,महाराष्ट्र जनक्रांती मोर्चा,संविधान जागर समिती,एकलव्य आदिवासी सेना,भिमसेना,कास्ट्राईब संघटना,भारत मुक्ती मोर्चा,लहुजी ब्रिगेड चे प्रमुख कार्यकर्ते उपस्थित होते.
पाचोरा तालुक्यात चर्मकार समाजाच्या १२ वर्षीय मुलीला गुंगीचे औषध पाजून तिच्यावर अत्याचार करणाऱ्या नराधमांना कठोर शासन व्हावे या मागणीसाठी जिल्ह्यातील मागासवर्गीय संघटना जिल्हाधिकारी कार्यालयासमोर मंगळवार दिनांक २४ मे रोजी सकाळी ११ वाजता निदर्शने आंदोलन करणार आहेत.
