जळगाव (प्रतिनिधी) बीएचआर पतसंस्थेतील कोट्यावधींच्या घोटाळा प्रकरणात आर्थिक गुन्हे शाखेने विविध बँकांना सुरज झंवर व कुटुंबियांच्या बँक खात्यांची माहिती घेण्यासाठी तसेच ती खाती गोठविण्यासाठी काही बँकांना पत्र दिले होते. परंतू सुरजने बँक खाती गोठवू नका म्हणून बँकेच्या अधिकाऱ्यांना फोनवरून धमकावल्याची माहिती पोलीस तपासात समोर आली आहे. दरम्यान, सुरजने संगनमत करून पुणे, निगडी आणि नशिराबाद येथील करोडोच्या मालमत्ता कवडीमोल दरात खरेदी केल्याचेही पोलीस तपासात समोर आले आहे.
सुरजला २ फेब्रुवारीपर्यंत पोलीस कोठडी सुनावण्यात आली होती. त्यानुसार न्यायालयाने सुरजला तब्बल ११ दिवसांची पोलीस कोठडी दिल्यामुळे पोलिसांनी रिमांड नोटमध्ये खूपच महत्वपूर्ण मुद्दे दिल्याचे स्पष्ट होते.
१) आरोपी सुरज सुनील झवर हा कटातील मुख्य सूत्रधार सुनील झवर याचा मुलगा असून पूर्वनियोजित कटानुसार भरण्यात आलेले विविध टेंडर हे सूरजने आपल्या लेटरपॅड वरून भरलेली आहेत.
२) सूरज हा श्री साई मार्केटिंग अँड ट्रेडिंग प्रायव्हेट लिमिटेड या कंपनीचा संचालक आहे. सूरजने आपले वडील सुनील झवर व इतर आरोपींची संगणमत करून साई मार्केटिंग अँड ट्रेडिंग कंपनी अशा नावाने टेंडर भरल्याचे भासवून पतसंस्थेचे कोहिनूर ओर्केट बल्क लँड नंबर २ निगडित तालुका हवेली येथील दुकान क्रमांक १६, १७, १८ व १८ (ए) या ७ कोटी रुपयांच्या मालमत्तेचा अपहार संगनमताने करून सदरची मालमत्ता २ कोटी ११ लाख ११ हजार १११ रुपयाला खरेदी केल्याची भासविले. परंतु यात मोठ्या प्रमाणावर मुदत ठेवीच्या पावत्या विकत घेऊन बेकायदेशीर वर्ग करण्यात आल्या होत्या. याचप्रकारे बालगंधर्व चौक घोले रोड पुणे येथील ४ व्यापारी गाळे जवळपास ८ कोटी पेक्षा जास्त किमतीचे केवळ ३ कोटी ११ लाख ३३ हजार १११ रुपयाला खरेदी केल्याचे भासविले. परंतु यात देखील मोठ्या प्रमाणावर मुदत ठेवीच्या पावत्या विकत घेऊन बेकायदेशीर वर्ग करण्यात आल्या होत्या. याच प्रकारे नशिराबाद येथील दुकान नंबर १,२,३ सुद्धा १९ लाख ५१ हजार ५१५ रुपयाला खरेदी केल्याचे भासवून अपहार केला आहे.
३) श्री साई मार्केटिंग अँड ट्रेडिंग कंपनी व श्री साई मार्केटिंग अँड ट्रेडिंग प्रायव्हेट लिमिटेड या दोघांचा पत्ता एकच म्हणजे ४२ खान्देश मिल शॉपिंग कॉम्प्लेक्स जळगाव असा आहे. श्री साई मार्केटिंग अँड ट्रेडिंग कंपनीमध्ये आरोपी सुरज हा भागीदार होता.
४) आरोपी सुरज याने विविध व्यक्तींच्या नावे भरलेल्या टेंडर फॉर्म हे स्वतःच्या हस्ताक्षरात लिहिलेली आहेत.
५) आरोपी सुरज सुनील झंवर व त्याच्या कुटुंब यांच्या बँकेची माहिती घेणेकरिता व खाते गोठविण्यात करता विविध बँकांना पत्रे दिली होती. त्यावर सुरजने जळगाव येथील एचडीएफसी बँकेचे मॅनेजर व युनियन बँक ऑफ इंडियाचे नाशिक येथील रिजनल मॅनेजर यांना फोनद्वारे धमकी देऊन सर्व खाती तात्काळ खुली करण्यास सांगितले होते, असेही पोलीस तपासात समोर आले आहे.
