धरणगाव (प्रतिनिधी) सुमारे ११ लाख रुपये घेऊन जाणाऱ्या एरंडोल तालुक्यातील फरकांडे येथील कापूस व्यापारी स्वप्नील रत्नाकर शिंपी खून प्रकरणातील सातवा संशयित आरोपी शशिकांत सुनील पवार याला आज धरणगाव कोर्टात हजर केले असता न्यायालयाने त्याची १४ दिवसांच्या न्यायालयीन कोठडी रवानगी केली.
थोडक्यात घटना आणि अटकेतील आरोपींची नावे
फरकांडे येथील कापूस व्यापारी स्वप्नील रत्नाकर शिंपी यांची कार पाळधी पेट्रोल पंपाजवळ २६ नोव्हेंबरला रात्री ८ वाजेच्या सुमारास तीन दुचाकीवर आलेल्या चौघांनी अडवत चाकूने भोसकून खून केला होता. या प्रकरणी १) नटवर किशोर जाधव (वय ३९ वर्षे रा. शिवकॉलनी, शिरुडनाका अमळनेर ता अमळनेर जि.जळगाव) २) कुणाल उर्फ बंटी सदाशिव वाणी (वय ४० वर्षे रा. चौगुले प्लॉट शनिपेठ, जळगाव), ३) विक्रम राजु सारवान (वय ३२ वर्षे रा. गुरु नानक नगर, शनिपेठ जळगाव) ,४) अंकुश किसन गवळी (वय ३६ वर्षे रा. गवळीवाडा, शनिपेठ, जळगाव) , ५) सनी धर्मराज पवार (वय २३ वर्षे रा. गुरुनानक नगर, शनिपेठ जळगाव), ६) अशोक जगदीश प्रजापत (वय २९ वर्षे रा.प्रजातप नगर, मुमुराबादरोड, जळगाव) या सहा जणांविरुद्ध गुन्हा दाखल करत सर्वाना अटक करण्यात आली आहे. यातील नटवर जाधव हा पोलीस कर्मचारी असून तोच या गुन्ह्याचा मास्टर माइंड असल्याचे पोलीस तपासात आधीच समोर आले आहे. दरम्यान, धरणगाव पोलिसांनी आज शशी पवार (वय. ३६ रा. श्रद्धा कॉलनीजवळ,सुरेशनगर, महाबळ, जळगाव) याला बुधवारी चौकशीअंती ताब्यात घेण्यात आले होते. त्याला आज धरणगाव न्यायलयात हजर केले असता त्याला १४ दिवसांच्या न्यायालयीन कोठडी देण्यात आली. दरम्यान, शशी महापालिकेचा कर्मचारी असल्याची प्राथमिक माहिती समोर येत आहे.
तांत्रीक पुरावे निष्पन्न झाल्यानंतरच शशिकांतला अटक
सदर गुन्हयातील आरोपी शशिकांत पवार याच्या विरुध्द गुन्हयाच्या तपासात मिळुन आलेले तांत्रीक पुरावे तसेच अटकेतील सर्व आरोपींनी प्राथमिक तपासात दिलेल्या माहीतीवरुन शशीकांतचा या गुन्हयाच्या कटात सहभाग असल्याचे पोलीस तपासात निष्पन्न झाले आहे. संशयित आरोपी शशीकांतकडून घटनेच्या दिवशी गुन्हयात वापरलेला मोबाईल फोन जप्त करण्यात आला आहे. विशेष म्हणजे पोलिसांनी जप्त केलेल्या मोबाईल मधील सिमकार्डचे एसडीआर बाबत खात्री करुन तसेच मिळालेल्या इतर साक्षीदारच्या जबाबाच्या अनुषंगाने तांत्रीक पुरावे निष्पन्न केल्यानंतरच शशिकांतला अटक केली आहे. दरम्यान, पोलिसांचा तपास सुरु असून आरोपीतांचे मोबाईल क्रमांकाचे सीडीआर व एसडीआर रिपोर्टचे अधिकृत / प्रमाणित प्रती प्राप्त करुन गुन्हयाचा कागदपत्र तयार करण्याच्या कामाला आता वेग येणार आहे.
मोबाईलमुळे गोत्यात आला शशीकांत
नटवर जाधव हा पोलीस कर्मचारी असून तोच या गुन्ह्याचा मास्टर माइंड असल्याचे पोलीस तपासात आधीच समोर आले आहे. दरम्यान, धरणगाव पोलिसांनी बुधवारी शशीकांत पवार याला ताब्यात घेतले असून शशीकांत हा नटवरचा नातेवाईक असल्याचे कळते. पोलिसांनी जप्त केलेल्या सीसीटीव्ही फुटेजमध्ये जळगाव शहर पोलीस स्थानका जवळील पार्किंगमधील सीसीटीव्ही फुटेजनुसार नटवर आणि शशीकांत एकत्र होते. हे दोघंच या गुन्ह्याचे मुख्य सूत्रधार असल्याची धक्कादायक माहिती पोलीस तपासात आता समोर येत आहे.
शशीकांतने केली मोबाईलची व्यवस्था आणि मदतीला दिले दोन जण
पोलीस तपासानुसार नटवरला प्रजापतने टीप दिल्यानंतर तो शशीकांतला भेटला. त्यानंतर शशीकांतने त्याचे मित्र सनी आणि विक्रमला या गुन्ह्यात नटवरला मदत करण्यास सांगितले. तसेच विक्रमकडे बांभोरीजवळ आपला मोबाईल दिला. त्यानंतर शशीकांत घरी गेला तर इतर चौघांनी स्वप्नील शिंपी यांचा पाठलाग करायला सुरुवात केली. पाठलाग करत असतांना आरोपी मोबाईलवर सतत एकमेकाच्या संपर्कात होते. पोलिसांनी पद्धतशीरपणे मोबाईचा डाटा गोळा करत आरोपींच्या मुसक्या आवळल्या.
विक्रम आणि शशीकांत असे आले गोत्यात
शशी आणि विक्रम हे एकमेकाला ओळखतात. विक्रम आणि सनी ज्या दुचाकीवरून घटनास्थळी पोहचले होते. ती दुचाकी दुसऱ्याची होती. पोलिसांनी संबंधित दुचाकी मालकाला शोधून काढले. दुचाकी मालकाने आपण दुचाकी सनी आणि विक्रमला दिली असल्याचे सांगितले. तर विक्रमने मला शशीकांतने मोबाईल दिला होता, असे चौकशीत सांगितल्याची माहिती सूत्रांनी दिली आहे. अशा पद्धतीने विक्रम आणि शशीकांत टप्प्या-टप्प्याने गोत्यात आले. या गुन्ह्यात वापरण्यात आलेल्या तीन मोटारसायकली देखील पोलिसांनी जप्त केल्या आहेत. त्यात फिर्यादीत नमूद असलेली होंडा युनिकॉन मोटारसायकलचा देखील समावेश आहे. तर गुन्ह्यात वापरलेले हत्यार अर्थात चाकू देखील पोलिसांनी जप्त केला आहे.
काय होती नेमकी घटना?
जळगाव येथून हवाल्याचे सुमारे १५ लाख रुपये घेऊन जाणाऱ्या एरंडोल तालुक्यातील फरकांडे येथील कापूस व्यापारी स्वप्नील शिंपी यांची कार पाळधी पेट्रोल पंपाजवळ शुक्रवारी रात्री ८ वाजेच्या सुमारास तीन दुचाकीवर आलेल्या चौघांनी अडवली. दुचाकीस्वाराला त्यांच्या कारने उडवल्याचा बहाणा करून पैशांची बॅग हिसकावून नेण्याचा प्रयत्न केला. व्यापाऱ्याने पैशांच्या बॅगेवरील स्वत:ची पकड सैल होऊ न दिल्यानंतर हल्लेखोरांनी त्यांच्या मांडीवर, पोटावर चाकूने वार केले. तशाही अवस्थेत व्यापाऱ्याने महामार्गावर जोरात पळत बचावाचा प्रयत्न केला. व्यापाऱ्यासह त्याच्यासोबतच्या कामगाराने प्रतिकार केल्यानंतर हल्लेखोर पैशांची बॅग सोडून पळून गेले. जखमी व्यापाऱ्याला तातडीने रुग्णवाहिकेत खासगी रुग्णालयात दाखल केल्यानंतर डॉक्टरांनी मृत घोषित केले होते.
