साकळी ता.यावल (प्रतिनिधी) तालुक्यातील हिंगोणा ग्रामपंचायत अंतर्गत मनरेगा व इंदीरा आवास घरकुल योजनेत मोठा आर्थिक गोंधळ झाल्याची तक्रार येथील सामाजीक कार्यकर्ते व विद्यार्थी मोर्चाचे जळगाव जिल्हा सचिव आकाश तायडे यांनी एका निवेदनाद्वारे केली आहे.
या संदर्भात आकाश तायडे यांनी दिलेल्या निवेदनात म्हटले आहे की, हिंगोणा ग्रामपंचायतव्दारे गावात विविध ठिकाणी गावा बाहेरील रस्त्यावर लाखो रुपये खर्च करून वृक्षांची लागवड करण्यात आल्याचे दाखविण्यात आले आहे. हिंगोणा मोर धरण प्रकल्प रस्ता १,३५० वृक्षांची लागवड, हिंगोणा पाटदुतर्फा ६०० वृक्षांची लागवड, बोरखेडा बु॥मोर धरण जवळ संबंधीत जागेवर १,५०० वृक्षांची लागवड, एन.यु.आर अंतर्गत हिंगोणा प्रकल्प १ लाख रोपे निर्मिती करणे त्याच प्रमाणे परिसरात २००० वृक्षरोपण, हिंगोणा ते बोरखेडा साईडपट्टयावर वृक्ष लागवड आदी लाखो रुपये खर्चाची कामे प्रत्यक्षात न करता दाखविण्यात आली आहे. त्याचप्रमाणे ग्रामपंचायत अंतर्गत गावात कामे सुरू झालेली इंदीरा आवास योजनांची घरे ग्रामपंचायत कर्मचारी आणी ग्रामरोजगार सेवकांच्या नांवाची मंजुर करण्यात आली आहे.
गावात कामाला न जाणाऱ्या मंडळींची रोजगार हमी योजनेच्या कामात सक्रीय मजुर असल्याचे दाखवुन त्यांचे नावे नोंदविण्यात आली आहे. गावातील स्वस्त धान्य दुकानचालक सुरेश नथ्थु नेहते यांचे जॉब कार्ड लाऊन सामान्य लोकांच्या घरकुल लाभार्थ्यांची मजुरी ही वर्ग करण्यात आली आहे. ज्यांचे घरकुल मंजुर झालेले आहेत त्या लाभार्थ्यांना याची कल्पना देखील नसल्याचे धक्का दायक प्रकार सध्या हिंगोणा ग्रामपंचायतीच्या अंतर्गत सुरू असुन ग्रामपंचायतच्या माध्यमातुन शासनाच्या विविध योजनांचा लाभ मिळवण्याच्या नावाखाली अनेक बोगस लाभार्थींच्या नावांची नोंद करण्यात आली आहेत. प्रत्यक्षात मात्र, अशी कुठलीही कामे झाल्याचे असल्याचे दिसून येत नसल्याने ग्रामपंचायतीच्यावतीने वरील सर्व कामात महाघोळ करून लाखों रुपयांचा भ्रष्ठाचार झाला आहे. याबाबत तहसीलदार आणि पंचायत समितीचे गटविकास अधिकारी यावल यांनी तात्काळ या सर्व कामांची चौकशी करून कारवाई करावी, अशी मागणी विद्यार्थी मोर्चाचे जिल्हा सचिव आकाश रमेश तायडे यांनी निवेदनाद्वारे केली आहे.
