धरणगाव (प्रतिनिधी) तालुक्यातील पिंपळे शिवारातील हॉटेल निसर्गमध्ये अवैधरित्या दारू विक्री होत असल्याची गुप्त माहिती मिळाल्यानंतर धाड टाकण्यासाठी गेलेल्या पोलिस पथकासोबत हॉटेल मालकाने अरेरावीची भाषा वापरत धक्काबुक्की करून पळ काढला. एवढेच नव्हे तर, खोट्या तक्रारी करेल, तुम्हाला बघून घेईल,अशी धमक्या देखील दिल्या. याप्रकरणी दोन जणांवर गुन्हा दाखल करण्यात आला आहे.
२७ ऑक्टोबर रोजी साधारण साडेअकरा वाजेच्या सुमारास सहाय्यक पोलीस निरीक्षक पवन देसले यांना गुप्त माहिती मिळाली की, पिंपळे शिवारातील निसर्ग ढाबा येथे अवैध दारू विक्री होत आहे. त्यानंतर सपोनि देसले आणि सपोनि गणेश आहिरे, पीएसआय अमोल गुंजाळ, होमगार्ड आत्माराम चौधरी अशांचे एक पथक घटनास्थळी रवाना झाले. पोलिसांचे पथक हॉटेल निसर्ग ढाब्यावर पोहोचल्यावर तिथे काही इसम दारू पीत बसले असल्याचे आढळून आले. यानंतर पोलिसांनी ढाब्याचे मालक राजेंद्र कोळीकडून दारूच्या बाटल्या बाबत चौकशी केली. परंतू त्याने अरेरावीची भाषा वापरायला सुरुवात केली. तसेच मी कोण आहे, तुम्हाला माहित आहे का?, तुम्हाला बघून घेईल. दारूबंदीवाल्यांनी सुद्धा मला मुद्दाम त्रास दिला आहे. आता तुम्हाला सुद्धा बघून घेईन, खोट्या तक्रारी अर्ज करेल, अशी धमकी देऊन पोलिसांच्या अंगावर धावून गेला. एवढेच नव्हे तर ढाबा मालक राजेंद्र कोळी यांनी पोहेका विनोद नेवे आणि होमगार्ड चौधरीला आत्माराम यांना धक्का देऊन अंधाराचा फायदा घेत पळ काढला. पोलिसांनी घटनास्थळी इम्पेरियल बल्यू, टॅंगो पंच, प्लास्टिक ग्लास, दोन गॅस सिलेंडर असा मुद्देमाल पोलिसांनी जप्त केला आहे. पोलीस कॉन्स्टेबल विनोद नेवे यांच्या फिर्यादीवरून राजेंद्र देविदास कोळी (वय ४७, रा. धरणगाव) रुपेश अनिल पाटील (वय २२, रा. टाकरखेडा ता.अमळनेर) या दोघांविरुद्ध ३५२, २८६, १८८, १८६, २६९, २७०, २७१,५०६, ३४ सह महाराष्ट्र पोलीस कायदा कलम ११०, ११२, ११७ सह मुंबई प्रोविजन कलम ६८, ८० ६५ (ई ) प्रमाणे गुन्हा दाखल करण्यात आला आहे.
