जळगाव ( प्रतिनिधी ) : पिंपळनेर येथे सत्संगाच्या कार्यक्रमासाठी गेलेल्या संदीप अशोक पाटील (वय ३७, रा. मनुमाता नगर) यांच्या घरात चोरट्यांनी डल्ला मारला. याठिकाणाहून चोरट्यांनी १ लाख ८० हजारांच्या रोकडसह सोने-चांदीचे दागिने असा एकूण ४ लाख ६ हजार रुपयांचा ऐवज चोरुन नेला. ही घटना दि. १६ रोज उघडकीस आली. याप्रकरणी एमआयडीसी पोलिस ठाण्यात अज्ञाताविरुद्ध गुन्हा दाखल करण्यात आला आहे.
शहरातील मनुमाता नगरात संदीप पाटील हे वास्तव्यास असून ते कृषी उत्पन्न बाजार समितीमधील अडत दुकानदार आहे. संदीप पाटील हे दि. १४ फेब्रुवारी रोजी कुटुंबासह धुळे जिल्ह्यातील पिंपळनेर येथे सत्संगाच्या कार्यक्रमासाठी गेले होते. त्यावेळी चोरट्यांनी घराच्या लोखंडी दरवाजाचा कोंडा तोडून घरात प्रवेश करीत घरातून रोकडसह सोने चांदीचे चोरुन नेले. दि. १६ रोजी पाटील हे घरी परतले त्या वेळी त्यांना घरात चोरी झाल्याचे लक्षात आले. त्यांनी. एमआयडीसी पोलिस ठाण्यात फिर्याद दिली. त्यावरून अज्ञात चोरट्यांविरुद्ध गुन्हा दाखल करण्यात आला आहे. पुढील तपास उपनिरीक्षक राहुल तायडे करीत आहेत.
चोरट्यांनी चोरुन नेला ऐवज
चोरट्यांनी लोखंडी कपाटातून रोख १ लाख ८० हजार रुपये, ६० हजार रुपये किमतीच्या कानातील सोन्याच्या साखळी व बाळ्या, २५ हजाराचे मंगळसूत्र, २५ हजाराचे कानातील टोंगल, ५० हजाराचे मंगळसूत्र, १५ हजाराची अंगठी, २५ हजाराचे टोंगल, २४ हजाराचे चांदीच्या पाटल्या व कडे, २ हजाराच्या पैंजन असा एकूण ४ लाख ६ हजार रुपये किमतीचा मुद्देमाल चोरून नेला.
