जळगाव (प्रतिनिधी) कोरोनाबाधित महिलेचा व्हेंटीलेटर अभावी मृत्यू झाल्याचा आरोप करत नातेवाईकांनी निलकमल हॉस्पिटलमध्ये आज दुपारी जोरदार तोडफोड केली. तर दुसरीकडे रुगांची प्रकृती पहिल्या दिवसापासून गंभीर होती. याबाबत नातेवाईकांना कल्पना दिली असल्याचा खुलासा रुग्णालयाने दिला आहे.
या संदर्भात अधिक असे की, संगिता पांडूरंग पाटील (वय ५०, रा. जिल्हा बँक कॉलनी) यांची प्रकृती खरब झाल्यानंतर त्यांना २९ सप्टेंबर रोजी निलकमल हॉस्पिटलमध्ये उपचारार्थ दाखल करण्यात आले होते. त्यांचा कोरोनाचा दुसरा रिपोर्ट उद्या १२ ऑक्टोबर रोजी येणार होता. परंतू आज दुपारी १२ वाजेच्या सुमारास संगिता पाटील यांची प्रकृती खालावल्यानंतर त्यांचा मृत्यू झाला. मृत्यूची बातमी कळताच मुलगा महेंद्र पाटील यांने आक्रोश केला. थोड्याच वेळात मयत महिलेचे नातेवाईक हॉस्पिटलमध्ये दाखल झाल्यानंतर त्यांनी रुग्णालयाची तोडफोड करायला सुरुवात केली. नातेवाईकांचा आरोप होता की, रूग्णाला व्हेंटीलेटरची आवश्यकता होती. परंतू डॉक्टरांनी फक्त ऑक्सिजनवर ठेवले. यावेळी नातेवाईकांनी हॉस्पिटलमध्ये दाखल असलेल्या इतर रूग्णांना ऑक्सीजन पुरवठा करणारे ऑक्सीजन सिलेंडर काढून फेकल्याचा आरोप रुग्णालय प्रशासनाने केला आहे.
