जळगाव (प्रतिनिधी) भाजपचे माजी मंत्री एकनाथराव खडसे पक्षांतर करतील हे सत्य आहे, असे महत्वपूर्ण वक्तव्य शिवसेनेचे प्रवक्ते तथा सार्वजनिक पाणीपुरवठा व स्वच्छता मंत्री गुलाबराव पाटील यांनी आज केले आहे.
गुलाबराव पाटील हे आज दुपारी अजिंठा शासकीय विश्रामगृहात असताना त्यांनी पत्रकारांशी संवाद साधला. यावेळी ना. पाटील म्हणाले की, सध्या एकनाथ खडसे कोणाच्या संपर्कात आहेत, याची मला माहिती नाही. पण ते पक्षांतर करतील हे सत्य आहे. दरम्यान, मुंबईत खडसे यांची राष्ट्रवादी प्रवेशाबाबत शरद पवार यांच्या सोबत भेट होणार असल्याची चर्चा होती. परंतू त्यांची भेट झाली नाही. काही दिवसांपूर्वी शरद पवार यांनी राष्ट्रवादीच्या जळगावातील नेत्यांना मुंबईत बोलावून घेत त्यांच्यासोबत बैठक घेऊन खडसे यांच्या राष्ट्रवादी प्रवेशाबाबत चाचपणी केली होती. तेव्हापासून खडसे यांच्या राष्ट्रवादी प्रवेशाची चर्चा सुरू आहे. मात्र, खडसे शिवसेनेत जाणार असल्याचीही चर्चा होती. दरम्यान, आता खडसे नेमकं कोणत्या पक्षात जाणार, याबाबत संभ्रम आहे.
