जळगाव (प्रतिनिधी) वाळूचोरीचा कुणाला संशय येऊ नये म्हणून वाळूवर खडीचा थर टाकून जात असलेला टॅक्टर एमआयडीसी पोलिसांनी मंगळवारी रात्री जप्त केला आहे.
या संदर्भात अधिक असे की, मंगळवारी रात्री एमअायडीसी पोलिस ठाण्याच्या हद्दीत सहाय्यक पोलिस उपनिरीक्षक आनंदसिंग पाटील आणि जितेंद्र राजपूत हे गस्तीवर असताना त्यांना गणेश अशोक कुंभार (वय २३, रा.पाळधी, ता.धरणगाव) हा विनाक्रमांकाच्या ट्रॅक्टरमधून वाळू वाहतूक करताना आढळून आला. तपासणी केली असता ट्रॅक्टरमध्ये दोन ब्रास वाळू होती. एवढेच नव्हे तर वाळू वाहतूकीची कोणतीही परवानगी गणेशकडे नव्हती. ट्रॅक्टरमध्ये वाळू असल्याचा कुणालाही संशय येऊ नये म्हणून वाळूच्या वरच्या बाजूला खडी परवलेली होती, जेणे करून बघणाऱ्याला असे वाटेल की, ट्रॅक्टरमधून खडी नेली जात आहे. दरम्यान, पोलिसांनी अधिक चौकशी केली असता वाळू निमखेडी येथील गिरणापात्रातून चोरी केली असल्याचे समोर आले. एमआयडीसी पोलिसांनी हा ट्रॅक्टर जप्त केला आहे. दरम्यान, वाळू चोरण्यासाठी वाळूमाफिया वेगवेगळ्या शक्कल काढत आहेत. आता या वाळू माफियांनी अधिकारी – पोलीस तसेच कोणाच्याही नजरेत येऊ नये म्हणून टिप्परमध्ये पूर्ण वाळू भरून वरच्या बाजूला विटा अथवा खडीचा थर रचत असतात.
