जळगाव (प्रतिनिधी) जळगाव जिल्हा दूध संघातील निवडणुकीची चुरस काहीशी मंदावलेची स्थिती आजच्या घडीला निर्माण झाली आहे. भाजप शिंदे गट आणि महाविकास आघाडीतील काही प्रमुख नेते सर्वपक्षीय पॅनलसाठी आग्रही असल्याची माहिती समोर येत आहे.दूध संघातील निवडणुकीत त माघारीला अवघा सोमवारचा दिवस शिल्लक असताना जोरदार घडामोडी घडायला सुरुवात झाली आहे. विश्वसनीय सूत्रांनी दिलेल्या माहितीनुसार भाजपा-शिंदे गट आणि महाविकास आघाडीतील काही बडे नेते सर्वपक्षीय पॅनलसाठी पुन्हा एकदा आग्रही असल्याचे कळते. त्यामुळे गुप्त भेटी आणि फोनवरून एकमेकांना संपर्क करत माघारी बाबत तोडजोडी सुरू असल्याची माहिती विश्वासनीय सूत्रांनी दिली आहे.
जिल्हा दूध संघाच्या निवडणुकीत काही दिवसांपासून एकमेकांवर मोठ्या प्रमाणात आरोप प्रत्यारोप सुरू होते. माजी मंत्री एकनाथराव खडसे आणि विद्यमान मंत्री गिरीश महाजन यांच्यातील आरोप प्रत्यारोपाने तर थेट कौटुंबिक पातळी गाठली होती. या दोघं नेत्यांमधील आरोप प्रत्यारोपामुळे दूध संघाची निवडणूक अत्यंत चुरशीची होण्याची दाट शक्यता निर्माण झाली होती. परंतु आज सकाळपासून अचानक वातावरण बदलले असून काही बडे नेते सर्व पक्षीय पॅनलसाठी जोरदार प्रयत्न करत आहेत. निवडणूक झाल्यास मोठ्या प्रमाणात आर्थिक नियोजन करावे लागणार असल्यामुळे दिग्गज नेते निवडणूक बिनविरोध होण्यासाठी प्रयत्नशील आहेत. विशेष म्हणजे सर्वपक्षीय पॅनलवरून दोन्ही गटांमध्ये दोन दोन गट पडल्याचे कळते. भाजपा-शिंदे गटातील एक गट सर्वपक्षीय पॅनलसाठी तर दुसरा गट निवडणुकीसाठी आग्रही आहे. अगदी हीच परिस्थिती महाविकास आघाडीमध्ये देखील असल्याचे कळते.
जिल्हा सहकारी दूध उत्पादक संघाच्या निवडणुकीतून माघार घेण्याकरीता आता केवळ एक दिवस शिल्लक असल्याने माघारी संदर्भात महाविकास आघाडी आणि भाजप-शिंदे-गटाने बैठका, मेळावे घेवून शुक्रवारी दिवसभर चर्चा केल्यात. त्यामुळे सर्वपक्षीय पॅनलची आशा धुसर झाली होती. परंतु आज सकाळपासून अचानक वातावरण बदलले असून सर्वपक्षीय पॅनल होण्याची शक्यता पुन्हा एकदा निर्माण झाली आहे.
जळगाव जिल्हा सहकारी दूध उत्पादक संघाच्या २० जागांसाठी दि. १० रोजी मतदान होणार आहे. या निवडणुकीत सर्वपक्षीय पॅनलचा पुन्हा एकदा प्रयोग केला जाणार होता. मात्र, भाजप आणि शिंदे गटाने खडसे नको हा नारा दिल्याने राष्ट्रवादीदेखील एक पाऊल मागे सरकली. दरम्यानच्या काळात राष्ट्रवादीचे नेते आमदार एकनाथराव खडसे, भाजपाचे मंत्री गिरीश महाजन आणि आ. मंगेश चव्हाण यांच्यात जोरदार आरोप-प्रत्यारोप झाले. त्यामुळे सर्वपक्षीय पॅनलच्या आशा धुसर झाल्या होत्या. त्यामुळे, भाजपा शिंदे गट विरुध्द महाविकास आघाडी असा सामना या निवडणुकीत पहायला मिळणार असे जवळपास निश्चित मानले जात होते. परंतु आज सकाळपासून अचानक वातावरण बदलले असून दोन आजी-माजी मंत्री सर्वपक्षीय पॅनलच्या दृष्टीने जोरदार प्रयत्न करत असल्याचे कळते.
एकीकडे जिल्हा दूध संघाच्या निवडणुकीसाठी माघार घेण्याकरीता केवळ सोमवारचा दिवस शिल्लक आहे. त्यामुळे एका दिवसात उमेदवारांचे अर्ज माघार कसे घ्यायचे? याबाबत उमेदवारांना बोलावून त्यांच्याशी चर्चा करण्याकरीता हालचाली सुरू असताना दुसरीकडे मात्र सर्वपक्षीय पॅनलची देखील मोर्चेबांधणी पुन्हा एकदा जोराने सुरू असल्याचे कळते.
