सोलापूर (वृत्तसंस्था) प्रेयसीसाठी गर्भवती पत्नीचा खून करणाऱ्या पतीस बार्शी सत्र न्यायालयाने जन्मठेपेची शिक्षा सुनावली आहे. महेश मिसाळ असे आरोपीचे नाव असून त्याने करत जबरी चोरीचा बनाव करत पत्नी मनिषा फुगारे हिचा डोक्यात दगड घालून खून केला होता.
उस्मानाबाद जिल्ह्यातील कोंबडवाडी येथील मनिषा फुगारे हिचा खामसवाडी येथील महेश मिसाळ याच्याबरोबर २०१७ साली विवाह झाला होता. लग्नानंतर दोघेही पुण्यात राहायला होते. आपला पती सतत एका महिलेशी फोनवरुन बोलत असल्याचे लग्नानंतर मनिषा हिच्या लक्षात आले. त्याबाबत तिने आपल्या माहेरी देखील कल्पना दिली होती. २ जानेवारी २०१८ रोजी महेश मनिषाला घेऊन अचानक सासुरवाडीला आला. त्यानंतर तिथून तो मनिषाला घेऊन बार्शीतल्या पाथरी येथे आपल्या बहिणीकडे गेला. त्यानंतर संध्याकाळी परत येत असल्याने मनिषा हिचे वडील दादाराव फुगारे यांना फोनवरुन सांगितले. मात्र उशीर झाल्यानंतर ही मुलगी-जावई न आल्याने दादाराव यांनी संपर्क साधण्याचा प्रयत्न केला. मात्र दोघांचे फोन लागत नव्हते. त्यामुळे नातेवाईंकासह दादाराव शोधण्यासाठी निघाले. रात्री येरमाळ्याजवळ रस्त्याच्या कडेला जावयाची दुचाकी पडलेली आढळली. तर तेथेच मनिषाचा मृतदेह देखील सापडला.
तर महेश मिसाळ हा उस्मानाबाद येथील शासकीय रुग्णालयात दाखल होता. महेश याला विचारणा केली असता चोरट्यांनी आपल्यावर हल्ला केला. त्यात आपण जखमी झालो आणि मनिषाचा मृत्यू झाल्याचे सांगितले.परंतू महेशच्या अंगावर असणाऱ्या जखमा या किरकोळ होत्या. त्यामुळे पांगरी पोलिस ठाण्याचे तत्कालीन स.पो.नि. धनंजय ढोणे यांना शंका आली. त्यांनी महेश मिसाळची कसून चौकशी केली असता त्याने हत्येची कबुली दिली. लग्नापूर्वीच नात्यातील एका मुलीसोबत आपले प्रेमसंबंध होते. प्रेयसीसोबत लग्न करायचे होते. मात्र त्यावेळी पत्नी मनिषा ही गर्भवती होती आणि ती लग्नाला अडसर ठरत होती. त्यामुळे डोक्यात दगड मारुन आणि चाकूने हल्ला करुन खून केल्याची कबुली आरोपी महेश मिसाळ याने कोर्टात कबुली दिल्याची माहिती सरकारी वकील अॅड. शांतवीर महिंद्रकर यांनी दिली. या प्रकरणी एकही प्रत्यक्षदर्शी पुरावा नव्हता, मात्र केवळ परिस्थितीजन्य पुरावे व्यवस्थितपणे सादर केल्याने न्यायलयाने जन्मठेपेची शिक्षा आणि २५ हजार रुपये दंडाची शिक्षा सुनावली आहे.
