जळगाव (प्रतिनिधी) अवैधरीत्या १ लाख १८ हजार २०२.१५८ ब्रास मुरूमाचे उत्खनन व वाहतूक केल्याप्रकरणी आमदार एकनाथराव खडसे, त्यांच्या पत्नी मंदाकिनी खडसे यांच्यासह ६ शेतजमीन मालकांना १३७ कोटींपेक्षा अधिक रकमेच्या दंडाची नोटीस मुक्ताईनगर तहसीलदारांनी बजावली आहे. यामुळे राज्याच्या राजकारणात प्रचंड खळबळ उडाली आहे.
नेमकं काय आहे प्रकरण !
‘मुक्ताईनगर तालुक्यातील सातोड येथे खडसे परिवारातील सदस्यांच्या नावाने सातोड शिवारात ३३ हेक्टर ४१ आर जमीन खरेदी करण्यात आली होती. राष्ट्रीय महामार्गासाठी बेकायदेशीरपणे एक लाख 18 हजार ब्रास गौणखनिज उत्खनन करण्यात येऊन तब्बल ४०० कोटींचा घोटाळा करण्यात आला आणि शासनाची फसवणूक झाली,’ अशी तक्रार मुक्ताईनगरचे शिवसेना शिंदे गटाचे आमदार चंद्रकांत पाटील यांनी महसूलमंत्र्यांकडे केली होती. तसेच विधिमंडळाच्या अधिवेशनातही हा मुद्दा उपस्थित केला होता.
४०० कोटींचा घोटाळा, आमदार चंद्रकांत पाटलांनी केला आरोप !
खडसे परिवारातील सदस्यांच्या नावाने सातोड शिवारात ३३ हेक्टर ४१ आर. जमिनीची खरेदी करण्यात आली होती. राष्ट्रीय महामार्गासाठी लागणाऱ्या गौण खनिजासाठी अवैध उत्खनन करीत ४०० कोटींचा घोटाळा झाल्याचा आरोप चंद्रकांत पाटील यांनी केला होता. त्यानुसार महसूलमंत्र्यांनी चौकशी करण्याचे आश्वासन दिले होते. त्यानंतर राज्य शासनाने विभागीय आयुक्तांच्या अध्यक्षतेखाली विशेष तपास पथक (एसआयटी) स्थापन केले होते. या चौकशी पथकाने सादर केलेला अहवाल राज्य शासनाने गेल्या महिन्यात स्वीकारला आहे. त्यानुसार दंडात्मक कारवाईची प्रक्रिया सुरु झाली आहे.
६ ऑक्टोबर रोजी बजावल्या नोटिसा !
मुक्ताईनगर तहसीलदारांनी ६ ऑक्टोबर रोजी या नोटिसा बजावल्या आहेत. मुक्ताईनगर तहसीलदार यांनी बजावलेल्या नोटिसीनुसार , मुक्ताईनगर तालुक्यातील सातोडमध्ये एकनाथ खडसे, त्यांची पत्नी मंदाकिनी खडसे यांच्यासह त्यांच्या कुटुंबातील सदस्यांच्या नावावर असलेल्या गट क्रमांक २२५ मधील १/२, २/१, २/२, २/३ या पोटहिस्स्यातून अवैध उपसा करण्यात आला आहे. त्यानुसार एकनाथराव खडसे, त्यांच्या पत्नी मंदाकिनी यांच्यासह सातोड (मुक्ताईनगर) येथील सहा जमीनमालकांना ६ ऑक्टोबर रोजी एकूण १३७ कोटीहून अधिक दंडाच्या रकमेच्या नोटीसा जारी करण्यात आल्या आहेत. एकनाथराव खडसेंच्या कन्या रोहिणी खडसे आणि खासदार रक्षाताई खडसे यांनाही नोटीस बजावण्यात आल्याचे कळते. त्यानुसार अवैधरीत्या उत्खनन केलेल्या गौण खनिजाचे मूल्य २६ कोटी १ लाख १२ हजार ११७ इतके आहे. यापोटी पाच पटीने दंडाची रक्कम निश्चित करण्यात आली आहे. त्यानुसार १३७ कोटी १४ लाख ८१ हजार ८८३ रुपयांचा दंड आकारण्यात आला आहे.
