अमळनेर (प्रतिनिधी) येथील नगरपालिकेच्या हशीमजी प्रेमजी व्यापारी संकुलात एका ३५ वर्षीय तरुणाचा गळा चिरून खून केल्याची धक्कादायक घटना आज पहाटे उघडकीस आलीय. या प्रकरणी पोलिसांनी अवघ्या तीन तासात आरोपी निष्पन्न केला असून पैशाच्या वादातून हा खून झाल्याचं समोर आले आहे.
यासंदर्भात अधिक असे की, प्रकाश दत्तू पाटील (वय ३५ रा. गांधलीपुरा, अमळनेर) असे मयताचे नाव आहे. या तरुणाचा हशीमजी प्रेमजी संकुलाच्या दुसऱ्या मजल्यावर हा खून झाला आहे. सकाळी सफाई कामगार झाडलोट करण्यासाठी गेले असता सदर प्रकार उघडकीस आला. घटनेचे वृत्त कळताच रजेवर असलेल्या पोलीस निरीक्षक जयपाल हिरे यांच्या मार्गदर्शनाखाली एपीआय राकेशसिंग परदेशी, हेडकॉन्स्टेबल सुनील हटकर, नगरसेवक नरेंद्र संदानशीव यांनी घटनास्थळी भेट देऊन पंचनामा केला. त्यांनंतर तरुणाला शव विच्छेदनसाठी ग्रामीण रुग्णालयात नेण्यात आले. दरम्यान, पैशाच्या वादातून हा खून झाल्याचे समजते. अवघ्या तीन तासात पोलिसांनी हा खून कैलास पांडुरंग शिंगाणे याने केल्याचे निष्पन्न केले.
