श्रीनगर (वृत्तसंस्था) जम्मू काश्मीरमधील पुंछ भागात आज जवान आणि दहशतवाद्यांमध्ये मोठी चकमक झाली आहे. या चकमकीत सैन्य दलाचे ४ जवान आणि जेसीओचा १ जवान शहीद झाले आहे.
जम्मू- काश्मीरमधील पूँछ जिल्ह्यातील डेरा की गली भागात सुरक्षा दल आणि दहशतवाद्यांमध्ये झालेल्या चकमकीत एक जेसीओसह पाच जवान शहीद झाले. सुरक्षा दलांनी परिसराला घेराव घातला असून सध्या चकमक सुरू आहे.
मिळालेल्या माहितीनुसार, जवळपास ४ दहशतवाद्यांनी सीमा पार करुन पूँछला जिल्ह्यात घुसखोरी केली होती. त्यानंतर हे दहशतवादी काश्मीर खोऱ्याच्या दिशेनं रवाना झाले. भारतीय सुरक्षा दलानं मुगल रोडजवळील डेरा की गली परिसरात या चार दहशतवाद्यांना घेरलं, त्यानंतर भारतीय सैन्य आणि दहशतवाद्यांमध्ये गोळीबार सुरु झाला. या चकमकीत पाच सैनिक गंभीररित्या जखमी झाले होते. त्यानंतर त्यांना तात्काळ रुग्णालयात दाखल करण्यात आलं होतं. मात्र त्याआधीच पाचही जवानांचा मृत्यू झाला. अजूनही परिसरात चकमक सुरु असल्याचं वृत्त आहे. यासह सुरक्षा दलांनी संपूर्ण परिसराला वेढा घातला असून सर्च ऑपरेशन सुरु आहे.
