छत्रपती संभाजीनगर (वृत्तसंस्था) जी-२० परिषदेच्या निमित्ताने शहराला स्वच्छ-सुंदर करणाऱ्या ठेकेदाराचे १ कोटी १३ लाख रुपयांचे बिल अदा करण्यासाठी ६० हजार रुपयांची लाच ‘पंटर’च्या ‘फोन पे’वर स्वीकारणाऱ्या अतिरक्त आयुक्तांचा स्वीय सहाय्यक मनोज सुभाष मारवाडी (रा. विवेकानंद, टीव्ही सेंटर) याला लाचलुचपत प्रतिबंधक विभागाच्या पथकाने अटक केली. . तसेच एक खाजगी व्यक्ती महेंद्र कदम (३० रा टीव्ही सेंटर) याचवरही. याप्रकरणात गुन्हा दाखल करण्यात आला आहे.
जी २० या आंतरराष्ट्रीय परिषदेनिमित्त शहराचे सौंदर्य वाढविण्यासाठी भिंत, पुलांची रंगरंगोटी करण्याचे टेंडरचे १ कोटी १३ लाख रुपयांचे बिल काढण्यासाठी ६० हजारांची लाच घेताना अतिरक्त आयुक्तांचा स्वीय सहाय्यक एसीबीच्या जाळ्यात अडकला. शुक्रवारी २३ जून रोजी लाचलुचपत प्रतिबंधक विभागाने ही कारवाई केली. मनोज मारवाडी या लाचखोर स्वीय सहाय्यकाचे नाव आहे. तसेच एक खाजगी व्यक्ती महेंद्र कदम याच्यावरही याप्रकरणात गुन्हा दाखल करण्यात आला आहे. शहरात आंतराष्ट्रीय जी-२० परिषदेचे आयोजन करण्यात आले होते. त्यावेळी शहर सौंदर्यासाठी शहरातील उड्डाणपूल, संरक्षण भिंतींवर आकर्षक रंगरंगोटी करण्याचे काम देण्याचे ठरविण्यात आले होते. त्यादृष्टीने मनपाच्या वतीने टेंडर प्रक्रिया पार पाडली गेली.
तक्रारदार रितसर टेंडर भरुन १ कोटी १३ लाख रुपयांचे झोन २, ३, ५ मध्ये काम केले. या झालेल्या कामाचे बिल काढण्यासाठी मारवाडी यांनी ६० हजारांची मागणी केली. तक्रार यांना लाच देण्याची इच्छा नसल्याने एसीबी कार्यालयात तक्रार दिली. प्राप्त तक्रारीवरुन एसीबीचे उपअधीक्षक दिलीप साबळे व त्यांच्या पथकाने सापळा रचला. लाचेची रक्कम स्वीकारताना मारवाडी यांना रंगेहाथ पकडून त्यांच्याविरुद्ध गुन्हा दाखल केला आहे. मारवाडी यांनी तक्रारदार यांना ६० हजार रुपये लाचेची मागणी केली. कार्यालयात ही रक्कम न घेता मारवाडी यांनी तक्रारदार यांना औरंगपुरा येथे एका दुकानावर बोलावून घेत एक खाजगी इसम महेंद्र कदम याच्या ‘फोन पे’ वर ६० हजार रुपयांची लाच घेतली. एसीबीचे अधीक्षक संदीप आटोळे यांच्या मार्गदर्शनात अपर पोलिस अधीक्षक विशाल खांबे यांच्या पथकाने हा सापळा यशस्वी केला.
