जळगाव (प्रतिनिधी) रामानंद नगर पोलीस ठाण्याच्या हद्दीत घरफोड्यांच्या वाढत्या घटनांवर नियंत्रण ठेवण्यासाठी विशेष मोहिम राबवण्यात आली. या मोहिमेत पोलिसांनी एका मोठ्या गुन्ह्याचा छडा लावत ८ घरफोड्यांची उकल केली. या प्रकरणात ५ सराईत गुन्हेगारांना अटक करण्यात आली आहे. त्यांच्याकडून १० तोळे सोने, ६५० ग्रॅम चांदी आणि LED टीव्ही यासह एकूण ८ लाख ७० हजार रुपयांचा मुद्देमाल जप्त करण्यात आला आहे. या घटनेत दोन आरोपी फरार झाले असून, त्यांचा शोध सुरू आहे.
जळगाव पोलीस अधीक्षक डॉ. महेश्वर रेड्डी यांनी शहरातील वाढत्या घरफोड्यांच्या घटनांवर नियंत्रण ठेवण्यासाठी विशेष मोहिम राबवण्याचे आदेश दिले होते. त्यानुसार, अपर पोलीस अधीक्षक अशोक नखाते आणि पोलीस उपअधीक्षक संदीप गावीत यांच्या मार्गदर्शनाखाली रामानंद नगर पोलीस ठाण्याचे पथक सक्रिय झाले. गुप्त माहितीच्या आधारावर पोलिसांना कळले की, सागर शिवराम डोईफोडे आणि त्याचे साथीदार हे महाबळ परिसरातील घरफोड्यांमध्ये सामील आहेत. पोलिसांनी सागरला ताब्यात घेतले आणि चौकशी दरम्यान त्याने ६ घरफोड्यांची कबुली दिली.
८.७० लाख रुपयांचा मुद्देमाल जप्त
सागर डोईफोडे आणि त्याच्या साथीदारांनी रात्रीच्या वेळी बंद घरांची चांगली तपासणी करून चोरी करण्याची रणनीती अवलंबली होती. ते खिडक्या तोडून घरात प्रवेश करत आणि मौल्यवान वस्तू लंपास करत होते. या गुन्ह्यांमध्ये चोरीस गेलेल्या वस्तूंपैकी १० तोळे सोने आणि ६५० ग्रॅम चांदी पोलिसांनी हस्तगत केली आहे. सागर डोईफोडेच्या माहितीच्या आधारे पोलिसांनी नितेश मिलिंद जाधव, दीपक विनोद आढाळे, रवी भागवत सोनवणे आणि अनिल उर्फ मारी भगवान सोनवणे यांना अटक केली. या आरोपींनी दोन घरफोड्यांची कबुली दिली असून, त्यांच्याकडून LED टीव्ही आणि इतर मुद्देमाल जप्त करण्यात आला आहे. पोलीस तपासादरम्यान आरोपींकडून जप्त करण्यात आलेल्या मुद्देमालामध्ये ८ लाख रुपये किमतीचे १० तोळे सोने, ६० हजार रुपये किमतीचे ६५० ग्रॅम चांदी आणि १० हजार रुपये किमतीचा LED टीव्ही यांचा समावेश आहे.
या यशस्वी कारवाईसाठी पोलिस निरीक्षक राजेंद्र गुंजाळ यांच्या मार्गदर्शनाखाली सहायक फौजदार संजय सपकाळे, पोलीस हवालदार जितेंद्र राजपूत, जितेंद्र राठोड, सुशील चौधरी, इरफान मलिक, पोलीस नाईक हेमंत कळसकर, रेवानंद साळुखे, विनोद सूर्यवंशी, पोलीस शिपाई रवींद्र चौधरी, उमेश पवार यांनी महत्त्वाची भूमिका बजावली. संपूर्ण गुन्ह्याचा अधिक तपास पोलिस निरीक्षक राजेंद्र गुंजाळ यांच्या मार्गदर्शनाखाली सहाय्यक पोलीस निरीक्षक विठ्ठल पाटील आणि पोलीस उपनिरीक्षक प्रदीप बोरुडे करत आहेत.
