डोंबिवली (वृत्तसंस्था) खदाणीत बुडत असलेल्या आपल्या आई आणि बहिणीला वाचवण्यास गेलेली १६ वर्षीय मुलगी बुडाल्याची हृदयद्रावक घटना डोंबिवली कोळेगाव परिसरात घडली आहे. अग्निशमन विभागाकडून या खदाणीत शोध कार्य सुरु आहे.
मानपाडा पोलिसांनी दिलेल्या माहितीनुसार, आई गीता आणि मुली परी (वय ४ वर्ष) आणि लावण्या (वय १६ वर्ष) अशी पाण्यात बुडालेल्या मायलेकींची नाव आहे. गीता आपल्या दोन मुलींसह कपडे धुण्यासाठी खदाणीत गेली होती. खेळता खेळता लहान मुलगी परीचा पाय घसरला आणि ती पाण्यात पडली. अशात आपल्या लेकीला वाचवण्यासाठी पोहता येत नसतानाही गीताने पाण्यात उडी घेतली. परी आणि गीता दोघींना पाण्यात पोहता येत नसल्याने लावण्या घाबरली आणि तिने त्यांना वाचवण्यासाठी पाण्यात उडी घेतली. लावण्याने मोठा हुशारीने आई आणि परीचा जीव वाचवला पण दुर्देवाने ती पाण्याच्या प्रवाहात अडकल्याची माहिती देण्यात आली आहे. मानपाड पोलीस सध्या घटनास्थळी लावण्याचा शोध घेत असून आई गीता आणि बहिण परी सुखरुप असल्याची माहिती देण्यात आली आहे. पोलीस घटनास्थळी दाखल झाले असून पोलिसांची मोठी टीम खदाणीत लावण्याचा शोध घेत आहेत. आई आणि बहिणीला वाचवून स्वत: मात्र पाण्याच्या प्रवाहात बुडाल्याने कुटुंबियांना मोठा धक्का बसला आहे.
दरम्यान या घटनेमुळे परिसरात हळहळ व्यक्त होत आहे. आपली मुलगी बुडाल्याने कुटुंबावर दुःखाचा डोंगर कोसळला आहे. मानपाडा पोलीस स्थानकात या घटनेची नोंद करण्यात आली आहे.
