चंद्रपूर (वृत्तसंस्था) भोगवटदार वर्ग दोनची जमीन वर्ग एकमध्ये रूपांतर करून देण्याच्या कामासाठी वरिष्ठांच्या नावाने दोन हजार रुपयांच्या लाचेची मागणी करणाऱ्या कोतवालाला पडताळणीनंतर लाचलुचपत प्रतिबंधक विभागाच्या पथकाने ताब्यात घेतले. कोरपना येथे बुधवारी ही कारवाई करण्यात आली असून, संजय कुळमेथे असे या लाचखोर कोतवालाचे नाव आहे.
कोरपना येथील रहिवासी असलेल्या एका व्यक्तीच्या मुलाची भोगवटदार दोनमध्ये असलेली शेतजमीन भोगावटदार एकमध्ये करायची होती. या कामासाठी कोतवाल संजय कुळमेथे याने तक्रारदाराला वरिष्ठांचे नाव सांगून दोन हजार रुपयांची मागणी केली. परंतु तक्रारदाराला पैसे देण्याची इच्छा नसल्याने त्यांनी याबाबत लाचलुचपत प्रतिबंधक विभागाकडे तक्रार दाखल केली. तक्रारीची पडताळणी केल्यानंतर लाचलुचपत प्रतिबंधक विभागाच्या पोलीस उपअधीक्षक मंजुषा भोसले व कर्मचाऱ्यांनी सापळा रचून त्याला ताब्यात घेतले.
कोतवाल संजय कुळमेथे विरुद्ध कोरपना पोलीस ठाण्यामध्ये गुन्हा दाखल करण्यात आला. ही कारवाई लाचलुचपत प्रतिबंधक विभागाचे पोलीस अधीक्षक राहुल माकनिकर, अप्पर पोलीस अधीक्षक संजय पुरंदरे यांच्या मार्गदर्शनाखाली चंद्रपूरच्या पोलीस उपअधीक्षक मंजुषा भोसले यांच्या नेतृत्वात पोलीस निरीक्षक जितेंद्र गुरनुले, पोलीस कर्मचारी रोशन चांदेकर, नरेश ननावरे, संदेश वाघमारे, सतीश सिडाम यांच्या पथकाने केली.
