जळगाव ( प्रतिनिधी ) – एटीएम मशीनमधील रक्कम न चोरता चोरट्यांनी थेट एटीएम मशीनच चोरून नेल्याचा धक्कादायक प्रकार गुरुवारी मध्यरात्री दीड वाजेच्या सुमारास घडला.
पोलनपेठ भागातील एविटास स्मॉल फायनान्स बँकेचे हे एटीएम चोरट्यांनी अवघ्या सहा मिनिटात चोरून नेले. विशेष म्हणजे चोरट्यांनी शहरातील जोशी पेठ भागातूनच मालवाहू वाहन चोरले व त्यातून मशीन घेऊन पसार झाले. हे वाहन व मशीन मन्यारखेडा शिवारात सापडले असून त्यातील साधारण सात लाख रुपयांची रोकड घेऊन चोरटे पसार झाले आहेत.
पोलन पेठ भागातील सत्यम प्लाझामध्ये एक्टिास स्मॉल फायनान्स बँकेची शाखा व एटीएम मशीन आहे. या एटीएममध्ये गुरुवारी रात्री १:२५ वाजता एक जण आतमध्ये गेला व त्याने मशीनला दोरखंड बांधला. त्यानंतर बाहेर उभ्या असलेल्या मालवाहू वाहनाने ओढून मशीन खाली पाडण्यात आले. त्या वेळी तेथे अन्य तीन जण आले व त्यांनी मध्यरात्री १:३१ वाजता सदर मशीन मालवाहू वाहनामध्ये टाकले व ते घेऊन चौघे जण भुसावळकडे जाणाऱ्या रस्त्याने पसार झाले.
मशिनची फिटीग व्यवस्थित नाही
चोरीला गेलेले एटीएम मशीनची नटबोल्टने व्यवस्थित फिटींगही केलेली नव्हती. त्यामुळे ते काढून नेल्यास चोरट्यांना अगदी सोपे गेल्याचे पोलिस तपास समोर येत आहे.
वॉचमनला दिसले चोरटे
चोरीसाठी आलेल्यांपैकी एक जण सुरुवातीला आत गेला. त्यावेळी या भागात असलेल्या वॉचमनला तो दिसला. मात्र पैसे काढण्यासाठी आले असावा, म्हणून तो पुढे निघून गेला. मात्र दोरखंडाने एटीएम ओढल्यानंतर काचा फुटून ते पडल्याचा मोठा आवाज आला. त्यावेळी वॉचमनने सुवर्णपेढीच्या वॉचमनला मदतीला बोलविले. मात्र तोपर्यंत चोरटे पसार झाले. वॉचमनने शनिपेठ पोलिस ठाण्याच्या पोलिस निरीक्षक कावेरी कमलाकर यांना माहिती दिली. त्यांनी तत्काळ शहर पोलिस ठाण्याचे निरीक्षक सागर शिंपी यांना माहिती दिली व पथक घटनास्थळी पोहचले.
बँकेच्या अधिकाऱ्यांना केला संपर्क
एटीएममध्ये काहीही गडबड असल्यास त्याविषयी असणाऱ्या बँकांच्या सेंट्रलायीज सिस्टीमद्वारे या एटीएममध्ये गडबड असल्याचे लक्षात आल्यानंतर यंत्रणेकडून सदर बँकेचे ऑपरेशन मॅनेजर भरत ओझा यांना कळविले. मात्र ते सुटीवर असल्याने त्यांनी शाखा व्यवस्थापक हरिष गांधी यांना कॉल केला. मात्र ते झोपेत असल्याने त्यांनी कॉल घेतला नाही. त्यानंतर २ ते २:१५ वाजेच्या सुमारास बँक कर्मचारी गांधी यांच्या घरी पोहचला व याविषयी माहिती दिली. त्यानंतर अधिकारी, कर्मचारी घटनास्थळी पोहचले.
रेकी नंतर चोरीची शक्यता
चोरी करणाऱ्यांनी अगोदर रेकी केल्याची शक्यता वर्तविली जात आहे. कोणते एटीएम चोरीसाठी सोयीचे आहे, याचा अंदाज घेत व्यवस्थित फिटींग नसलेले एटीएमच त्यांनी निवडले. या शिवाय वाघूर धरणाकडे जाणाऱ्या रस्त्यावरील जंगलात एटीएम नेऊन रोकड काढल्यामुळे त्यांना रस्त्यांचीही माहिती असण्याची शक्यता आहे. चोरट्यांनी सहा मिनिटात मशीन चोरले.
जळगावात अवघ्या ६ मिनिटांत…
मात्र ते स्क्रू ड्रायव्हर अन्य साहित्याद्वारे फोडण्यासाठी चोरट्यांना एक ते दीड तास लागल्याची माहिती समोर येत आहे.
हद्दपारांची ओळख परेड अन् ईकडे चोरी
शहर पोलिस ठाण्याच्या हद्दीत ३५ एटीएम आहेत.
त्या एटीएमसह अन्य ठिकाणी रात्री गस्त घालणारे पथक हद्दपार आरोपींच्या ओळखपरेडमध्ये असताना इकडे चोरट्यांनी एटीएम लांबविले. याविषयी शाखा व्यवस्थापक हरिष गांधी यांनी शहर पोलिस ठाण्यात फिर्याद दिली. त्यावरून अज्ञात चोरट्यांविरुद्ध गुन्हा दाखल करण्यात आला आहे.
