बुलढाणा (वृत्तसंस्था) समृद्धी महामार्गावर झालेल्या भीषण अपघातात दोन जणांचा जागीच मृत्यू तर एक जण गंभीर जखमी आहे. अपघातानंतर कारने पेट घेतला आणि या आगीत कार जळून खाक झाली. यात कारमधील दोन जणांचा होरपळून मृत्यू झाला.
आज बुलढाण्यातील देऊळगाव कोळ गावानजीक समृद्धी महामार्गावर भरधाव कार ईम्पॅक्ट बॅरियरला धडकून मध्यरात्रीच्या सुमारास भीषण अपघात झाला. कारनं एवढ्या जोरात इम्पॅक्ट बॅरियरला धडक दिली की, कारनं जागीच पेट घेतला. गाडीला लागलेली आग एवढी भीषण होती की, गाडीतील प्रवाशांना बाहेर पडण्यासही वेळ मिळाला नाही. या अपघातात दोघांचा जागीच होरपळून मृत्यू झाला आहे. तर एक प्रवासी गंभीर जखमी असून त्याच्यावर स्थानिक रुग्णालयात उपचार सुरू आहेत. अपघातग्रस्त कार नागपूरहून मुंबईकडे जात होती. त्यावेळी ही दुर्घटना घडली. मृतांची ओळख मात्र अद्याप पटलेली नाही. दरम्यान, टोलप्लाझा येथील काही कर्मचाऱ्यांनी आग विझवण्याचे प्रयत्न केले. परंतु आग इतकी भीषण होती की, कारचा जळून कोळसा झाला होता.
