चोपडा (प्रतिनिधी) शहरातील निर्मल डेअरी येथून घेतलेल्या दुधात प्लॅस्टिक सापडल्याचे कारण सांगून त्याचा व्हिडिओ व्हायरल केला. त्यानंतर डेअरी मालकाला धमकी देऊन 75 हजार रुपयांची खंडणी घेतल्याप्रकरणी शिक्षकासह मुलाविरुद्ध चोपडा पोलीस ठाण्यात गुन्हा दाखल करण्यात आला आहे.
शहरातील निर्मल डेअरी येथून ऋषी संजय पाटील (वय 27) यांनी 19 ऑक्टोबरला संध्याकाळी सहाच्या सुमारास दूध घेतले. दूध तापवले असता दुधावर प्लॅस्टिक सदृश्य साय आली. ऋषी यांनी त्याचा व्हिडिओ तयार करीत सोशल मीडियावर व्हायरल करीत तो डेअरीचे संचालक प्रल्हाद बळीराम पाटील (वय 55, रा. गणेश कॉलनी, चोपडा) यांना टाकला. सोबत बदनामी थांबवायची असेल, तर एक लाख रुपये द्या, अन्यथा बदनामी करेल, अशी व्हॉट्सअॅपवर धमकी दिली. त्यानंतर ऋषी संजय पाटील (वय 27) व उपशिक्षक संजय विक्रम पाटील (दोघे रा. बिडगाव ता. चोपडा, ह. मु. साने गुरुजी कॉलनी, चोपडा) हे दोघे पिता-पुत्र प्रल्हाद पाटील यांना डेअरीवर येऊन भेटले. यावेळी त्यांनी सांगितले की, हे प्रकरण संपवा व मुलगा सांगतो ते करा. त्यानंतर प्रल्हाद पाटील यांनी घाबरून ऋषी पाटील याला ७५ हजार रुपये रोख रक्कम दिली. त्यानंतर ऋषी याने दुधाबाबत कोणतीही समस्या नसल्याचे सांगून प्रकरण थांबवले. त्यानंतर प्रल्हाद पाटील यांनी चोपडा शहर पोलिसांना माहिती दिली. त्यावरून शनिवारी (ता. २६) मुलगा ऋषी पाटील व त्याचे वडील संजय पाटील यांच्यावर चोपडा शहर पोलिस ठाण्यात खंडणीचा गुन्हा दाखल केला आहे. तसेच पुढील तपास पोलिस उपनिरीक्षक जितेंद्र वल्टे हे करीत आहेत.
