बोदवड (प्रतिनिधी) येथील तहसील कार्यालयातील शिवीगाळ, मारहाण करुन टेबलवरील कागदपत्रे फेकून देण्याची घटना शुक्रवारी घडली होती. याप्रकरणी बोदवड पोलिसांनी दोघांविरुद्ध गुन्हा नोंदविला आहे.
१६ सप्टेंबर शुक्रवार रोजी दुपारी एक वाजेच्या सुमारास तहसील कार्यालयात नायब तहसीलदार संध्या सूर्यवंशी आपल्या दालनात शासकीय काम करत बसलेल्या होत्या. यावेळी प्रितम अवचित पालवे हे असिफ शेख या व्यक्तीसोबत गेले. आपल्या टेबलवर माझ्या नोंदीची कागदपत्रे पडलेली असून आपण ते नोंदचे काम करून देत नाही? अशी विचारणा करुन वाद घालण्यास सुरुवात केली. यावेळी त्याने असिफ शेखला शूटिंग करण्यास सांगितले. त्यानंतर नायब तहसीलदार संध्या सूर्यवंशी यांचे टेबल वाजवले व कागदपत्रे फेकली व काही कागदपत्रे फाडली.
वाद जोरात सुरू असताना तहसील कार्यालयात कर्मचारी असलेले सचिन पाटील हे त्याठिकाणी आले व त्यांनी असे करू नका, शांत व्हावा, असे सांगितले. यावेळी त्यांनाही मारहाण करून शिवीगाळ करण्यात आली. दरम्यान, गोंधळामुळे यावेळी बघ्यांची मोठी गर्दी जमली होती. घटनास्थळी पोलीसही पोहोचले व त्यांनी दोघांनाही ताब्यात घेतले. हा प्रकार घडताच तहसील कार्यालयातील सर्व कर्मचारी पोलीस ठाण्यात आले आणि संध्याकाळपर्यंत थांबून होते. याप्रकरणी पोलिसांनी सूर्यवंशी यांच्या तक्रारीवरुन दोघांविरुद्ध शासकीय कामात अडथळा आणल्याचा गुन्हा नोंदविला असून पुढील तपास स.पो.नि अंकुश जाधव हे करीत आहेत.
