भुसावळ (प्रतिनिधी) तालुक्यातील चोरवड येथे दारूच्या नशेत एकाने वेटरला शिवीगाळ करून सुरीने वार केल्यामुळे वेटर गंभीर जखमी झाल्याची घटना समोर आली आहे. त्याला उपचारासाठी जळगाव येथे दाखल करण्यात आले असून ही घटना दि. ५ फेब्रुवारी रोजी दुपारी दीड वाजण्याच्या सुमारास घडली.
याबाबत अधिक माहिती अशी की, जामनेर रोडवरील हॉटेल भागाईमधील वेटर नजाकत अली उर्फ मेजवान युनूस अली याच्यावर आरोपी वेटर कमलेश शाळीग्राम जवरे (२४, हल्ली रा. चोरवड, मूळ रा. देऊळगाव गुजरी, ता. जामनेर) याने दारूच्या नशेत शिवीगाळ करतमानेवर, तोंडावर, डोळ्याच्या वर कांदा कापण्याच्या सुरीने वार करून जखमी केले. संशयिताला पोलिसांनी ताब्यात घेतले असून त्याच्याविरुद्ध तालुका पोलिस ठाण्यात गुन्हा दाखल केला आहे. तपास पोलिस निरीक्षक महेश गायकवाड हे करत आहेत.
