यावल (प्रतिनिधी) तालुक्यातील किनगाव येथून दिवाळीचा बाजार करून दुचाकीने डांभुर्णी मार्गे घरी डिकसाई (ता.जळगाव) येथे जाणाऱ्या एका व्यक्तीचा ट्रकच्या धडकेत मृत्यू झाला. शनिवारी सायंकाळी साडेपाच वाजेच्या सुमारास हा अपघात झाला. निंबा चव्हाण (वय ४८), असे मृताचे नाव आहे.
सायंकाळी साडेपाच वाजता किनगाव (ता. यावल) येथून दिवाळीची खरेदी करून डिकसाई (ता.जळगाव) येथील आपल्या घरी दुचाकीने (क्र. एमएच. १९ – बीपी. २१ ९६ ) डांभुर्णी मार्गे निघाले होते. डांभुर्णीकडे जाताना पाटचारीजवळ मंगेश कोळी यांच्या शेतासमोर डांभुर्णीकडून किनगावकडे भरधाव वेगाने येणाऱ्या ट्रकने (क्र. आरजे ११ जीबी. ७६ ९६ ) त्यांच्या दुचाकीला समोरून धडक दिली. या अपघातात निंबा चव्हाण हे जागीच ठार झाले. याप्रकरणी यावल पोलिसांत अपघाताची नोंद रात्री उशिरा करण्यात आली.
