भडगाव प्रतिनिधी : शहरात अमली पदार्थांच्या तस्करीचा धक्कादायक प्रकार उघडकीस आला असून भडगाव पोलिसांनी केलेल्या मोठ्या कारवाईत दाम्पत्याला अटक करण्यात आली आहे. ‘एमडी’ (मेफेड्रोन) या घातक अमली पदार्थाचा शहरात प्रथमच इतक्या मोठ्या प्रमाणावर साठा जप्त झाल्याने संपूर्ण तालुक्यात खळबळ उडाली आहे. याप्रकरणी भडगाव पोलीस ठाण्यात गुन्हा दाखल करण्यात आला आहे.
पोलिसांना मिळालेल्या गोपनीय माहितीनुसार, पारोळा येथून भडगावकडे एका खाजगी कारमधून अमली पदार्थांची खेप येणार असल्याची माहिती मिळाली होती. या माहितीच्या आधारे पोलिसांनी रविवारी (२२ मार्च) सायंकाळी सुमारे ६ वाजता जुन्या पारोळा रस्त्यावरील पाण्याच्या टाकीजवळ कडेकोट नाकाबंदी करून सापळा रचला.
दरम्यान, संशयास्पद हालचाली आढळलेल्या फोर्ड फिस्टा (एमएच ०१ बीबी २२१६) या कारला अडवून सखोल तपासणी करण्यात आली. तपासणीदरम्यान कारमध्ये अत्यंत चलाखीने लपवून ठेवलेला मेफेड्रोन (एमडी) हा अमली पदार्थ आढळून आला. पोलिसांनी सुमारे १४.३५० ग्रॅम वजनाच्या १० पुड्या जप्त केल्या असून त्यांची किंमत सुमारे ४० हजार रुपये असल्याचे सांगण्यात आले.
हा अमली पदार्थ मानवी आरोग्यास अत्यंत घातक असून पूर्णपणे प्रतिबंधित आहे. या कारवाईत अमली पदार्थांसह तस्करीसाठी वापरलेली कारही जप्त करण्यात आली आहे. जप्त केलेल्या पदार्थाची तांत्रिक खातरजमा करण्यासाठी जळगाव येथील फॉरेन्सिक तज्ज्ञांना पाचारण करण्यात आले आहे.
या प्रकरणामागे आंतरजिल्हा पातळीवर कार्यरत असलेल्या मोठ्या रॅकेटचा संबंध असण्याची शक्यता पोलिसांनी व्यक्त केली आहे. पोलिसांनी योगेश हरी चौधरी (वय ३५) व त्याची पत्नी (रा. पारोळा, ह.मु. भडगाव) यांना घटनास्थळीच ताब्यात घेतले असून दोघांवर एनडीपीएस कायद्यांतर्गत गुन्हा दाखल करण्यात आला आहे. या प्रकरणाचा पुढील तपास पोलीस निरीक्षक महेश शर्मा करीत आहेत.
