जळगाव (प्रतिनिधी) – दिवाळीच्या सुदूया असल्यामुळे कुटुंबिय अमळनेर येथे गावी गेलेले होते. त्यामुळे घर बंद असल्याची संधी साधत चोरट्यांनी दरवाजाचे कुलूप तोडून डल्ला मारला. याठिकाणाहून ५० हजार रुपयांच्या रोकडसह १९ हजार १०० रुपयांचे दागिने चोरुन नेले. ही घटना दि. १२ रोजी कुसुंबा येथे घडली. याप्रकरणी एमआयडीसी पोलिसात गुन्हा दाखल करण्यात आला आहे.
तालुक्यातील कुसुंबा येथे राहणारे गोपीचंद धोंडू पाटील (वय ५१) हे खासगी नोकरीस आहे. दिवाळीच्या सुट्टी असल्यामुळे ते दि. १० नोव्हेंबर रोजी कुटुंबीयांसह अमळनेर येथे मूळ गावी गेले होते. त्या वेळी चोरट्यांनी घराच्या मागील बाजूने किचनच्या दरवाजाचे कुलूप तोडून घरामध्ये प्रवेश केला. घरातून रोख ५० हजार रुपये, साडे तीन तोळ्याचे कर्णफुले असा एकूण ६९ हजार १०० रुपये किमतीचा ऐवज लांबविला. दि. १२ नोव्हेंबर रोजी नळाला पाणी आले असल्याने पाटील यांच्या शेजारी राहणारे नळ बंद करण्यासाठी गेले असता त्यांना दरवाजा उघडा दिसला. त्यांनी या विषयी पाटील यांना माहिती दिली. त्यानुसार ते घरी आले व एमआयडीसी पोलिस ठाण्यात फिर्याद दिली. त्यावरून अज्ञात चोरट्यांविरुद्ध गुन्हा दाखल करण्यात आला आहे. तपास पोहेकॉ प्रमोद लाडवंजारी करत आहेत.
गॅस सिलिंडरही लांबवले
राजीव गांधी नगरमधील सुनीता प्रमोद मोरे (वय ४०) या बाहेरगावी गेलेल्या असताना चोरट्यांनी घराची कडी, कुलूप तोडून घरात प्रवेश केला. घरातून रोख २० हजार रुपयांसह गॅस सिलिंडर असा एकूण २२ हजार रुपये किमतीचा ऐवज चोरून नेला. ही घटना दि. ११ नोव्हेंबर रोजी उघडकीस आली. या प्रकरणी सुनीता मोरे यांनी रामानंद नगर पोलिस ठाण्यात फिर्याद दिली. त्यावरून अज्ञात चोरट्यांविरुद्ध गुन्हा दाखल करण्यात आला आहे.
