सटाणा (प्रतिनिधी) – पत्नीच्या चारित्र्यावर संशय घेऊन तिची कुऱ्हाडीने निघृण हत्या करणाऱ्या पतीला न्यायालयाने जन्मठेपेची शिक्षा सुनावली आहे. बागलाण तालुक्यातील दसाणे येथे २०२१ मध्ये घडलेल्या या खुनाच्या खटल्यात आरोपीच्या पाच वर्षांच्या मुलाची प्रत्यक्षदर्शी साक्ष अत्यंत महत्त्वपूर्ण ठरली. आरोपी हिरामण काळू वाघ (वय ४५, रा. लोहणेर, ता. देवळा, ह.मु. दसाणे) असे आरोपीचे नाव असून, मालेगाव येथील अपर जिल्हा व सत्र न्यायालयाने शुक्रवारी (दि. ६) त्यास दोषी ठरवून जन्मठेप आणि पाच हजार रुपये दंडाची शिक्षा सुनावली.
याबाबत पोलिसांनी दिलेली माहिती अशी की, २ मार्च २०२१ रोजी दुपारी दीड वाजेच्या सुमारास दसाणे येथे आरोपी हिरामण वाघ याने पत्नी संगिता हिच्या चारित्र्यावर संशय घेऊन तिच्याशी वाद घातला. याच वादातून त्याने घरातील कुऱ्हाड उचलून पत्नीच्या डोक्यावर घाव घातले. या हल्ल्यात गंभीर जखमी झालेल्या संगीता यांचा मृत्यू झाला. ही संपूर्ण घटना समक्ष पाहणाऱ्या पाचवर्षीय मुलगा अजय याने शेजारी आणि नातेवाइकांना याबाबत माहिती दिली. न्यायालयातील सुनावणीदरम्यान अजयची साक्ष गुन्हा सिद्ध करण्यासाठी महत्त्वपूर्ण ठरली.
या प्रकरणी संजय गोविंदा पवार यांनी सटाणा पोलीस ठाण्यात फिर्याद दिल्यानंतर हिरामण वाघ याच्याविरुद्ध खुनाचा गुन्हा दाखल करण्यात आला होता. तत्कालीन सहायक पोलीस निरीक्षक देवेंद्र शिंदे यांनी या गुन्ह्याचा तपास करून मालेगाव येथील सत्र न्यायालयात दोषारोपपत्र दाखल केले. अतिरिक्त जिल्हा व सत्र न्यायाधीश एम.ए. भोसले यांच्या न्यायालयात या खटल्याची सुनावणी झाली. सरकार पक्षातर्फे अॅड. संजय सोनवणे आणि अॅड. अशोक पगारे यांनी बाजू मांडली. या खटल्यात सरकार पक्षाने एकूण नऊ साक्षीदार तपासले.
