भुसावळ (प्रतिनिधी) – तरुणाईचे भविष्य उद्धवस्त करणाऱ्या अंमली पदार्थांच्या अवैध धंद्याविरोधात भुसावळ तालुका पोलिसांनी पहाटेच्या अंधारात जोरदार धडक दिली आहे. किन्ही एमआयडीसी परिसरात गुरुवारी ६ नोव्हेंबर) पहाटे २.५५ वाजता टाकलेल्या छाप्यात तब्बल ६२.२१ ग्रॅम मेफेड्रोन (एमडी) जप्त करत चौघांना अटक करण्यात आली. या कारवाईत दोन महागड्या मोटारसायकली आणि चार मोबाईलसह तब्बल ७ लाख २८ हजार ८४० रुपयांचा मुद्देमाल पोलिसांनी हस्तगत केला. या कारवाईने भुसावळ परिसरातील एमडी ड्रग्जच्या अवैध व्यवहाराचे
गांभीर्य पुन्हा एकदा समोर आले आहे.
विशेष म्हणजे, जप्त करण्यात आलेल्या एकूण एमडीपैकी तब्बल ५५.३३ ग्रॅम एमडी असगरखान अनवरखान (वय ५७, रा. अयान कॉलनी, भुसावळ) याच्याकडून मिळून आली. त्यामुळे या व्यवहारामागील नेमके सूत्रधार कोण, एमडीचा पुरवठा कुठून होत होता आणि ग्राहकांचे जाळे किती मोठे आहे, याकडे आता तपास यंत्रणांचे लक्ष लागले आहे.
या प्रकरणात रिशभ कुणाल खेडकर (१८, रा. कंडारी), प्रथमेश दिलीप आव्हाड (२७, रा. दादासाहेब रुपवते सोसायटी), शेख अफजल शेख रहेमतुल्ला (२६, रा. नसरंजी फाईल) आणि असगरखान अनवरखान (५७, रा. अयान कॉलनी) या चौघांना अटक करण्यात आली आहे. पोलिसांनी २ लाख ४८ हजार ८४० रुपये किमतीची ६२.२१ ग्रॅम एमडी पावडर, ३ लाख २५ हजार रुपये किमतीच्या रॉयल एनफिल्ड बुलेट व पल्सर मोटारसायकली आणि १ लाख ५५ हजार रुपये किमतीचे आयफोन १६, आयफोन १३, टेक्नो व रेडमी असे चार मोबाईल जप्त केले आहेत. याप्रकरणी भुसावळ तालुका पोलीस स्टेशनमध्ये गुन्हा दाखल करण्यात आला आहे.
एमडीचा पुरवठादार कोण?
एमडीसारख्या घातक अंमली पदार्थांची विक्री आणि साठवणूक करणाऱ्यांवर कारवाई होणे आवश्यकच आहे. मात्र, केवळ आरोपींना अटक करून प्रश्न संपणार नाही. या ड्रग्जचा मुख्य पुरवठादार कोण? भुसावळमध्ये एमडी पोहोचते कशी? या प्रश्नांची उत्तरे तपासातून समोर येणे गरजेचे आहे.
