जळगाव (प्रतिनिधी) पार्ट टाईम जॉब देण्याचे अमिष दाखवित दोन जणांनी तरुणीला ५ लाख ७९ हजार रुपयांत ऑनलाईन गंडविल्याची घटना उघडकीस आली. याप्रकरणी तरुणीच्या तक्रारीवरुन सायबर पोलीस ठाण्यात गुन्हा दाखल करण्यात आला आहे.
भुसावळ शहरातील ओम पार्क येथे राहणारी ३२ वर्षीय तरुणी हे आपल्या परिवारासह वास्तव्याला आहे. दि. १९ ऑक्टोबर रोजीपासून व्हाट्सअप व टेलिग्राम या सोशल मीडियावर निधी व अमित अशी नावे सांगत तरुणीशी जवळीक साधली. त्यानंतर वेळोवेळी तरुणीशी संपर्क साधून तरुणीला पार्ट टाइम जॉब देण्याचे अमिष दाखविले. त्यानंतर फ्लाईट बुकिंगचे टास्क पूर्ण करण्यासाठी खाते रिचार्ज करण्यासाठी त्यांच्याकडून वेळोवेळी ऑनलाइन पद्धतीने एकूण ५ लाख ७९ हजार ७९४ रुपये घेवून त्यांची आर्थिक फसवणूक केली.
हा प्रकार लक्षात आल्यानंतर तरुणीने मंगळवारी सायंकाळी ४ वाजता सायबर पोलीस ठाण्यात धाव घेऊन अज्ञात दोन जणांविरोधात तक्रार दिली आहे. त्यानुसार अमित आणि निधी असे नावे सांगणाऱ्या अज्ञात व्यक्तींविरोधात सायबर पोलीस ठाण्यात गुन्हा दाखल करण्यात आला आहे. या घटनेचा पुढील तपास पोलीस निरीक्षक लीलाधर कानडे करीत आहे.
