जळगाव (प्रतिनिधी) -: पत्ता विचारण्याच्या बहाण्याने पायी फिरणाऱ्या महिलेला थांबविले. त्यांना बोलण्यात गुंतवून ठेवत दोन तोळ्याचे दागिने ठेवलेली पर्स घेऊन दोन जण पसार झाले. ही घटना रविवार दि. ८ नोव्हेंबर रोजी शहरातील गिरणा टाकी परिसरात घडली. याप्रकरणी रामानंदनगर पोलिस ठाण्यात गुन्हा दाखल करण्याचे काम सुरू होते.
शहरातील भगवान नगर परिसरातील लीना महाजन या नेहमीप्रमाणे काव्यरत्नावली चौकाकडे पायी फिरायला जात होत्या. दरम्यान, त्यांना दुचाकीवरुन आलेल्या एका प्रौढाने त्यांना थांबवून पत्ता विचारला. तसेच हरिद्वारहून आल्याचे सांगत देवाचे पाठ करायचे असल्याचे सांगत बोलण्यात गुंतविले. त्यादरम्यान महिलेने गळ्यातील मंगळसूत्र व कानातील दागिने, मोबाईल पर्समध्ये ठेवले. काही वेळानंतर पर्स नसल्याचे महिलेच्या लक्षात आले. तोपर्यंत दोन जण पर्स घेऊन पसार झाले होते.
घटनेची माहिती मिळताच रामानंद नगर पोलीस ठाण्याचे अधिकारी व गुन्हे शोध पथकातील कर्मचारी घटनास्थळी दाखल झाले. त्यांच्याकडून परिसरातील सीसीटीव्ही फुटेजच्या आधारावर संशयिताचा शोध सुरु आहे.
