भंडारा (वृत्तसंस्था) धानाची पोती भरून उभ्या असलेल्या ट्रॅक्टरवर दुचाकी धडकल्याने दोन तरुणांचा मृत्यू झाल्याची दुर्दैवी घटना रविवारी (१९ नोव्हेंबर) रात्री आठ वाजेदरम्यान पवनी-भेंडाळा मार्गावर घडली. पीयूष गजानन राजभोयर (१७, रा. भेंडाळा) व नीलेश श्रीपत मेश्राम (२४, रा. दहेगाव) अशी मृतक तरुणांची नावे आहेत.
रविवारी भेंडाळा (चौ.) येथे मंडई उत्सवाचे आयोजन करण्यात आले होते. उत्सव बघण्यासाठी मृतक नीलेश हा मित्र पीयूष याच्यासोबत दुचाकीने गेला. तो भेंडाळा येथील सोनटक्के यांच्या घरी पाहुणा म्हणून आला होता. कामे आटोपून गावाकडे परतत असताना वैनगंगा नदी पुलावर उभ्या असलेल्या गुड्डू रघुते (मु. कुर्झा) यांच्या ट्रॅक्टरवर दुचाकी आदळली. यावेळी दोघांनाही गंभीर दुखापत झाली. ही माहिती वाऱ्यासारखी पसरताच बघ्यांची गर्दी उसळली.
घटनास्थळी पोलीस दाखल होताच दोन्ही जखमींना ग्रामीण रुग्णालयात दाखल करण्यात आले. उपचारादरम्यान डॉक्टरांनी दोघांनाही मृत घोषित केले. पोलिसांनी भादंविच्या कलम ३०४ (अ) सहकलम १०२ (२), १०३, १२२/१७७ नुसार गुन्हा दाखल केला. पुढील तपास ठाणेदार नरेंद्र निस्वादे यांच्या मार्गदर्शनात एसआय निखिल राहाटे करीत आहेत.
