जळगाव (प्रतिनिधी) माजी मंत्री एकनाथराव खडसे यांना जळगाव येथील वैद्यकीय महाविद्यालयाकडून दिलेले अपंगत्वाचे वैद्यकिय प्रमाणपत्राची चौकशी करून तसेच दिशाभुल करणाऱ्यासाठी पदाचा गैरवापर करून प्रमाणपत्र घेणारे खडसे यांच्यावर कठोर कारवाई करण्यात यावी, अशी मागणी शिवसेनेचे गजानन मालपुरे यांनी जिल्हाधिकाऱ्यांकडे एका निवेदनाद्वारे केली आहे.
शिवसेनेचे गजानन पुंडलिक मालपुरे यांनी निवेदनात म्हटले आहे की, एकनाथराव गणपतराव खडसे यांनी दि. १२ ऑगस्ट २०२१ रोजी एन्डरोलमेंट नं. २७०३/०००००/२१०८/०७६०८०२ नुसार अपंगत्वाचे वैद्यकिय प्रमाणपत्र मिळणेसाठी अर्ज दाखल केला होता त्यानुसार त्यांना दि. ०६ सप्टेंबर २०२१ रोजी अपंगत्वाचा दाखला देण्यात आल्याचे खात्रीशीर वृत्त आहे. तरी, एकनाथराव गणपतराव खडसे हे महाराष्ट्रातील प्रभावी व वजनदार तसेच दंबग तंत्राचा वापर करणे राजकीय वलय असलेले नेते आहेत. त्यामुळेच त्यांना गेल्या अनेक वर्षापासून मोठ्या प्रमाणात संरक्षण शासकीय खर्चाने कोटयावधी रुपये खर्च करून दिले जात आहे. असे असतांना त्यांनी दि. ०६ सप्टेंबर २०२१ नंतर जळगाव शहरात व जिल्ह्यात विविध कार्यक्रमांना उपस्थिती लावलेली आहे. त्यामुळे त्यांना दिलेले अपंगत्वाचे वैद्यकिय प्रमाणपत्र हे कोठेतरी संशयाच्या भोवऱ्यात आहे.
याबाबत आपणांस विनंती करण्यात येते की, सक्त वसुली संचालनालय यांनी त्याच्या वेळोवेळी चौकशी कामी बोलविले असतांना, ते टाळाटाळ करीत आहे, जेव्हा की शासनाने त्यांना जे पोलीस संरक्षण दिलेले आहे त्या पोलीस अधिकारी व कर्मचाऱ्यांचा जबाब घेतला तर निश्चितच सत्य उलगडण्यास व न्यायालयीन प्रक्रियेचा वेळोवेळी होत असलेली दिशाभुल व शासकीय पैश्याचा अपव्यय टाळणेसाठी आपल्या स्तरावरुन लवकरात लवकर चौकशी करून खोटे प्रमाणपत्र दिलेले असल्यास प्रमाणपत्र देणारे अधिकारी व तज्ञ डॉक्टर तसेच दिशाभुल करणाऱ्यासाठी पदाचा गैरवापर करून प्रमाणपत्र घेणारे एकनाथराव गणपतराव खडसे यांचेवर कठोर कारवाई करण्यात यावी, अशी मागणी निवेदनाद्वारे केली आहे.
