नशिराबाद (सुनील महाजन) सर्वत्र अस्वच्छता, तुंबलेल्या गटार, सांडपाणी गल्लीबोळातून वाहतेय, ठिकठिकाणी साचलेले कचर्याचे ढीग…, असे चित्र गावात दिसून येते. सर्वत्र अस्वच्छतेमुळे नशिराबादकरांचे आरोग्य धोक्यात आले आहे.
जिल्ह्यात सर्वांत मोठे नशिराबाद गाव आहे. सध्या विविध साथरोगांचा प्रादुर्भाव वाढला आहे. वातावरणातील बदलामुळे सर्दी-खोकला, तापासह विविध साथरोगांचे रुग्ण आढळून येत आहेत. गावातील रुग्ण जळगावमध्ये जाऊन उपचार घेत आहेत. गावाजवळून गेलेल्या महामार्गाच्या चौपदरीकरणाच्या कामामुळे तुंबलेल्या गटारांची अवस्था अत्यंत दयनीय बनली आहे. अनेकदा याबाबत ओरड करूनही त्याकडे प्रशासनाचे दुर्लक्ष झाले आहे. कोणी दखल घेणार का? असे ग्रामस्थांकडून विचारणा केली जात आहे. तुंबलेल्या गटारांच्या सांडपाण्यातूनच ग्रामस्थांना ये-जा करावी लागत आहे. महामार्ग चौपदरीकरणाच्या कामामुळे गावातील बसस्थानकाजवळील वरची आळी परिसरातील गटारातील सांडपाणी जाण्याचा मार्ग बंद झाला आहे. त्यामुळे गटार तुडुंब भरून वाहत आहे. ग्रामस्थांनी याबाबत अनेकदा ओरड केली.
तुंबलेल्या गटारांमुळे डासांचे प्रमाण वाढले आहे. परिणामी साथरोग फैलावल्यानंतरच प्रशासनाला जाग येईल का आणि मगच दखल का, असा प्रश्न उपस्थित करीत ग्रामस्थांमध्ये संताप व्यक्त केला जात आहे. गावातील रस्ते काँक्रिटचे असून, आता ते पूर्णपणे उखडले आहेत. गटारांतील सांडपाण्याने रस्त्यांची वाट लागली आहे. गावातील या समस्यांकडे लक्ष देऊन त्या सोडविण्याची मागणी आता जोर धरू लागली आहे.
समस्या सोडविण्याची गरज – सुनील महाजन
गाव जिल्ह्यात मोठ्या लोकसंख्येचे असून, पूर्वी ग्रामपंचायत होती. आता नगरपरिषदेत रूपांतर झाले आहे. गावात समस्यांनी डोके वर काढले आहे. गटारांतील सांडपाणी रस्त्यावरून वाहते आहे. त्यामुळे डास, मच्छरांचा प्रादुर्भाव वाढला असून, साथरोग फैलावण्याची शक्यता आहे. या समस्यांकडे लक्ष देऊन सोडविण्याची गरज असल्याचं शिवसेना कार्यकर्ता सुनील महाजन म्हणाले.
सध्या सर्वत्र करोनाचा संसर्ग वाढत आहे. गावातही ठिकठिकाणी कचर्याचे ढीग साचले आहेत. सांडपाणी रस्त्यावरून वाहते. सांडपाणी निचरा होण्यासाठी उपाययोजना व्हाव्यात, असे सामाजिक कार्यकर्ते राहुल रंधे म्हणाले.
गावातील रस्त्यांची दैना झाली आहे. रस्ते सिमेंट काँक्रिटचे आहेत. सध्या ते उखडून खड्डे झाले आहेत. त्यात सांडपाणी साचून वाहन गेल्यास पादचार्यांच्या अंगावर उडून वाद होतात. याकडे लक्ष देण्याची गरज आहे, असं सामाजिक कार्यकर्ते अशोक पवार म्हणाले.
