अमरावती (वृत्तसंस्था) तालुक्यातील दूनी येथील एका २४ वर्षीय महिलेने एकाचवेळी चार मुलींना जन्म दिला आहे. चारही बाळ व माता सुखरूप आहेत.
दुनी येथील रहिवासी असलेल्या पपिता बळवंत उईके या महिलेला बुधवारी सकाळी साडेनऊ वाजताच्यादरम्यान धारणी उपजिल्हा रुग्णालयात प्रसूतीकरिता येथील उपजिल्हा रुग्णालयात दाखल करण्यात आले होते. या महिलेबद्दल उपजिल्हा रुग्णालयातील डॉक्टरांना अधिक माहिती नव्हती. रुग्णालयात दाखल झाल्यानतर गर्भात एकापेक्षा जास्त बाळ असू शकतात, असा अंदाज डॉक्टरांनी वर्तविला होता. महिलेने यापूर्वी सोनोग्राफी न केल्याने डॉक्टरदेखील संभ्रमात होते.
प्रथम बाळाची प्रसूती झाल्यानंतर एका पाठोपाठ तीन बालकांची प्रसूती झाली. नॉर्मल प्रसूती झाल्याने स्थानिक उपजिल्हा रुग्णालयात ही माहिती सर्वत्र पसरली. चारही बाळ मुली असून त्या सुखरूप आहे. या चार बालकांचे वजन १ किलो ३०० पर्यंत आहे. उपजिल्हा रुग्णालयातील स्त्री रोग विशेषतज्ञ डॉ. प्रीती शेंद्रे, परिचारिका तेजस्वी गोरे, नंदा शिरसाट यांच्या चमूने अत्यंत अवघड व गुंतागुंतीची प्रसूती नॉर्मल केल्याने यांचे धारणी शहरांमधून कौतुक होत आहे. बाळांचे वजन कमी असल्याने त्यांना धारणी उपजिल्हा रुग्णालयातील अतिदक्षता विभागात उपचारासाठी डॉ. जावरकर व डॉ. अश्विन पवार यांच्या मार्गदर्शनात ठेवण्यात आले आहे.
