चोपडा (प्रतिनिधी) भगिनी मंडळ चोपडा संचलित, समाजकार्य महाविद्यालय चोपडा येथील बी.एस्.डब्ल्यू.द्वितीय व तृतीय वर्ष आणि एम्.एस्.डब्ल्यू. द्वितीय वर्षाच्या विद्यार्थ्यांमार्फत क्षेत्रकार्यांतर्गत चोपडा तालुक्यातील वैजापूर येथे आभा कार्ड नोंदणी अभियान राबवण्यात आले. सदर अभियान राबवण्यासाठी महाविद्यालयातील प्राध्यापक डॉ.आशिष गुजराथी व प्रा. नारसिंग वळवी यांनी क्षेत्रकार्याच्या विद्यार्थ्यांना मार्गदर्शन केले व प्रत्यक्ष अभियानाच्या कार्यावाहीत सहभाग नोंदवला.
सर्वप्रथम विद्यार्थ्यांनी दि. २० ऑगस्ट २०२३ रोजी वैजापूर, खाऱ्यापाडाव मुळ्यावतार आणि शेनपाणी या गावातील लोकांना आभा कार्ड नोंदणी अभियानाविषयीचे माहितीपत्रक वाटले व आभा कार्ड नोंदणीसाठी आवाहन केले. व नागरिकांना आभा कार्डाचे महत्त्व पटवून दिले. विद्यार्थ्यांनी लोकांना आभा कार्ड नोंदणीसाठी आवश्यक असलेली कागदपत्रे, नोंदणीची वेळ व ठिकाण यासंदर्भात माहिती दिली.
दि. २२ रोजी वैजापूर येथील वनविभागाच्या विश्रामगृहात आभा कार्ड नोंदणी अभियान संपन्न झाले. सदर अभियानात वैजापूर गावातील ५४ व्यक्तींची आभा कार्ड नोंदणी करण्यात आली. वैजापूर येथील आभा कार्ड नोंदणी अभियानात क्षेत्रकार्याचे विद्यार्थी विशाल भालेराव, नाना साबळे, अरूण भोई, नेहा देशमुख, दिपाली रामोशी आणि क्षेत्र कार्य पर्यवेक्षक प्रा.आशिष गुजराथी व प्रा.नारसिंग वळवी यांनी स्वतः आभा कार्ड नोंदणी केल्या.
दि. २३ रोजी खाऱ्यापाडाव या गावातील ५२ व्यक्तींची आभार नोंदणी करण्यात आली. खाऱ्यापाडाव येथे क्षेत्रकार्याचे विद्यार्थी ऋतिक चव्हाण, अरूण भोई व नाना साबळे यांनी आभा कार्ड नोंदणी केल्या. तसेच या अभियानासाठी दुर्गेश पवार, अमित पावरा, हिमानी पाटील, संदीप पावरा, सुवर्णा धनगर, वैष्णवी धनगर, दिपाली चव्हाण, साक्षी परदेशी, आकाश पावरा, रासिंग वसावे, रंगिता पाडवी, सरस्वती पावरा, अजित भिल, लोकेश गवळी, गुणवंत शिरसाठ, उत्कर्ष जगताप, अजय शिरसाठ, सुहास वसावे, नम्रता मावची, जयता वळवी, अश्विनी धनगर आणि वंदना पावरा यांनी परिश्रम घेतले.
सदर आधार कार्ड नोंदणी अभियानाचे वेळी नागरिकांमध्ये उत्साहपूर्ण वातावरण दिसून आले. आभा कार्ड नोंदणीसाठी नागरिकांच्या सोयीनुसार लॅपटॉप व मोबाईलद्वारे आभा कार्ड नोंदणी करण्यात आल्या. बऱ्याच नागरिकांच्या आधार कार्डला मोबाईल नंबर लिंक नव्हता किंवा लिंक असल्यास तो मोबाईल नंबर उपलब्ध नव्हता. त्यामुळे अशा नागरिकांच्या आभा कार्ड नोंदणी होऊ शकल्या नाही. या समस्येवर देखील येणाऱ्या काळात समाजकार्य महाविद्यालयातील क्षेत्रकार्याचे विद्यार्थी व प्राध्यापक निश्चितच मार्ग काढतील असा नागरिकांनी विश्वास व्यक्त केला. समाजकार्य महाविद्यालयाने राबवलेल्या स्तुत्य उपक्रमाबद्दल नागरिकांनी महाविद्यालयातील विद्यार्थ्यांचे आणि प्राध्यापकांचे अभिनंदन केले व आभार मानले.
