पुणे (वृत्तसंस्था) पुणे महसूल विभागातील अतिरिक्त विभागीय आयुक्त डॉ. अनिल रामोड यांना ८ लाखांची लाच घेताना सीबीआयने शुक्रवारी रंगेहात अटक केल्यानंतर एकच खळबळ उडाली. दरम्यान, सीबीआयच्या पथकाने रामोड यांच्या बाणेर येथील घरी पथकाने छापा टाकला असता, महत्त्वपूर्ण कागदपत्रांसह तब्बल सहा कोटी रुपयांची रोकड जप्त करण्यात आली.
डॉ. अनिल रामोड यांच्याकडे नॅशनल हायवे अथॉरिटी इंडियाच्या (एनएचएआय) पुणे, सातारा आणि सोलापूर जिल्ह्याचे लवादाचे काम आहे. तसेच राष्ट्रीय महामार्गाच्या भूसंपादनाबाबत निर्णय घेण्याचा अधिकार डॉ. रामोड यांच्याकडे आहेत. तक्रारदार शेतकऱ्याच्या सव्वा कोटी रुपये वाढीव भरपाईसाठी १० लाख रुपयांची लाचेची मागणी त्यांनी केली होती. तडजोडीअंती ८ लाख घेण्याचे निश्चित झाले होते. त्यानंतर रक्कम घेताना डॉ. रामोड पकडले गेले.
दरम्यान, सीबीआयच्या पथकाला रामोड यांच्या बाणेर घरातून सहा कोटी रुपयांची रोकड आणि डॉ. रामोड यांच्या आणि कुटुंबाच्या नावावर असलेल्या १४ स्थावर मालमत्तांसह मालमत्तेशी संबंधित कागदपत्रे, गुंतवणूक बँक खाते तपशील आणि इतर दस्तऐवज सीबीआयला सापडल्याचे वृत्त आहे. तर नोटांची मोजदाद करण्यासाठी अधिकाऱ्यांना नोटा मोजण्याच्या दोन मशीन मागवाव्या लागल्या होत्या. रामोड हा पुणे विभागीय आयुक्त कार्यालयात अपर आयुक्त म्हणून काम पाहत होता. त्याच्याबाबत काही दिवसांपासून येत असलेल्या लाचखोरीच्या तक्रारीनंतर शुक्रवारी ही कारवाई करण्यात आली.
