जळगाव (प्रतिनिधी) नापास करण्याची धमकी देत अल्पवयीन विद्यार्थिनीवर वारंवार अत्याचार केल्याप्रकरणी जिल्हा न्यायालयाने एका खासगी क्लासच्या शिक्षकाला मरेपर्यंत जन्मठेपची शिक्षा सुनावली आहे. तुषार शांताराम माळी (३३, रा. नशिराबाद परिसर), असे आरोपी शिक्षकाचे नाव आहे.
आरोपी तुषार माळी हा नशिराबाद परिसरामध्ये श्रीसमर्थ क्लासेस नावाने खाजगी क्लास चालवित होता. त्याने पिडीत मुलीच्या आई-वडिलांना भेटून मी तुमच्याकडून फी घेणार नाही. तुमच्या मुलीला शिष्यवृत्तीचा क्लास माझ्याकडे लावा, प्रवृत्त केले. त्यानंतर ऑगस्ट २०१७ पासून विद्यार्थिनी क्लासला जायला लागली. तुषार हा विद्यार्थिनीला शिष्यवृत्तीच्या बॅचच्या एक तास अगोदर क्लासमध्ये बोलवून चॉकलेट खाण्यास द्यायचा. त्यानंतर घरामध्ये नेवून अत्याचार करायचा. त्याने डिसेंबर-२०१७ ते फेब्रुवारी-२०१८ या कालावधीमध्ये शिष्यवृत्ती परीक्षेत नापास करेल अशी धमकी देत अल्पवयीन विद्यार्थिनीवर वारंवार अत्याचार केले. तसेच दोघांचे फोटो लोकांना दाखवून बदनामी करेल, अशीही धमकी शिक्षक माळी हा देत होता. त्यामुळे भेदरलेल्या विद्यार्थिनीने कुणालाही काहीही सांगितले नाही.
मात्र, मार्च-२०१८ मध्ये पिडीताचे पोट दुखत असल्यामुळे तिला तिच्या आईने जळगावातील रूग्णालयात उपचारार्थ दाखल केले. त्यावेळी विद्यार्थिनी ही गर्भवती असल्याची धक्कादायक गोष्ट उघड झाली. त्यानंतर १७ मार्च २०१८ रोजी नशिराबाद पोलिस ठाण्यात तुषार माळी याच्याविरूध्द गुन्हा दाखल करण्यात आला होता. जिल्हा न्यायालयातील जिल्हा सत्र व अतिरिक्त सत्र न्यायाधीश एस.एन.माने यांच्या न्यायालयात सरकार पक्षातर्फे एकूण १६ साक्षीदार तपासण्यात आले. त्यानंतर संपूर्ण पुराव्याअंती तुषार माळी यांना दोषी धरून गुरूवारी मरेपर्यंत जन्मठेप आणि सव्वा लाख दंडाची शिक्षा सुनावली. दरम्यान, या प्रकरणामध्ये पीडित विद्यार्थिनीला बालकांचे लैंगिक छळापासून संरक्षण नियम २०१२ मधील कायदा ७ नुसार महाराष्ट्र शासनाकडून १० लाख रूपये रक्कम पुर्नवसनासाठी देण्याचे आदेश देखील जिल्हा न्यायालयाने दिले आहे.
