भुसावळ (प्रतिनिधी) शहरात रेल्वे हॉस्पिटल परिसरात गोळीबाराच्या अफवेनंतर रस्ता लूट करण्याच्या प्रयत्नातील फरार आरोपी भारत वाडेकर याचा सर्पदंशाने मृत्यू झाला आहे.
नशिराबाद पोलिस स्टेशनला यासंदर्भात अकस्मात मृत्यूची नोंद करण्यात आली आहे. ही नोंद शहर पोलीस ठाण्यात वर्ग करण्यात येणार असल्याची माहिती नशिराबाद पोलिस स्टेशन मधून देण्यात आली आहे. भुसावळ शहरात ८ नोव्हेंबर रोजी रेल्वे दवाखाना परिसरात गोळीबार झाल्याची अफवा पसरली होती. यावेळी डीवायएसपी सोमनाथ वाघचोरे शहराचे पोलीस निरीक्षक बाबासाहेब ठोंबे व बाजारपेठेचे पोलीस निरीक्षक दिलीप भागवत यांनी घटनास्थळी धाव घेऊन कसून चौकशी केली. त्यावेळी संबंधित अधिकाऱ्यांनी मुकेश बाविस्कर व पवन सपकाळे यांना अटक केली. त्यांच्याकडून चाकू फायटरसह इतर हत्यार हस्तगत करण्यात आले होते. तरुण भारत वाडेकर हा घटना घडल्यापासून फरार होता.
याबाबत शहर पोलीस ठाण्यात गुन्ह्याची नोंद करण्यात आली होती. तेव्हापासून भरत वाडेकर या संशयित आरोपीला पोलीस शोधत होते. वसुबारसच्या रोजी स्मशानभूमीत वाडेकर रात्रीच्या वेळेस झोपला. रात्री झोपेत त्याला सर्पदंश झाले. मात्र याकडे त्याने दुर्लक्ष केले. विषबाधा वाढत गेल्याने तो स्वतःहून गोदावरी रुग्णालयात उपचारासाठी दाखल झाला. त्याचा मंगळवारी उपचारादरम्यान मृत्यू झाला. याबाबत नशिराबाद पोलीस स्टेशनला डॉ. श्रीकांत जाधव यांच्या खबर वरून अकस्मात मृत्यूची नोंद केली आहे.
