जळगाव (प्रतिनिधी) मानवातील कोविड प्रमाणेच गुरांसाठी आत्यंतीक संसर्गजन्स असणार्या लंपी डिसीजच्या प्रतिकारासाठी जिल्हा दूध संघाने कृती आराखडा आखला असून आज मुख्य प्रशासक आमदार मंगेश चव्हाण यांच्या अध्यक्षतेखाली बैठकीत जिल्हाव्यापी गुरांच्या लसीकरणाचे निर्देश जारी करण्यात आले आहेत.
या संदर्भातील अधिक असे की, जिल्ह्यातील अनेक भागांमध्ये गुरांवर लंपी डिजीजचा प्रादूर्भाव झाला आहे. यात रावेर तालुक्यात मोठ्या प्रमाणात संसर्ग झाल्यामुळे तेथील सहा गावांमध्ये गुरांसाठी लॉकडाऊनसदृश्य नियमावली जिल्हा प्रशासनाने जाहीर केली आहे. हा आजार मोठ्या प्रमाणात पसरत असल्यामुळे शेतकरी धास्तावले आहेत. जिल्ह्यातील दुग्ध उत्पादकांची ही समस्या लक्षात घेऊन दूध संघाचे मुख्य प्रशासक आमदार मंगेश चव्हाण यांनी आज तातडीची बैठक घेतली. या बैठकीला प्रशासक अरविंद देशमुख, अमोल शिंदे, अजय भोळे, एम.डी. श्री.मोरखेडे, श्री लिमये यांची उपस्थिती होती.
याप्रसंगी आमदार मंगेश चव्हाण यांनी लंपीमुळे उदभवलेल्या स्थितीचा आढावा घेऊन यावर उपाययोजना म्हणून फक्त संसर्ग झालेल्या क्षेत्रातच नव्हे, तर संपूर्ण जिल्हाभरातील गुरांचे लसीकरण करण्यात यावे असे निर्देश दिले. यासाठी जिल्हा दूध संघाने पुढाकार घेऊन दुग्ध उत्पादकांना दिलासा दिला आहे. दरम्यान, या संदर्भात मुख्य प्रशासक आमदार मंगेश चव्हाण म्हणाले की, दूध संघ हा दुग्ध उत्पादकांच्या हितासाठी कार्यरत असून त्यांच्यावर येणारी प्रत्येक अडचण ही आमची अडचण समजून दूध संघ यापुढे कार्यरत राहणार आहे. दुग्ध उत्पादकांच्या हितासाठी आम्ही कटीबध्द असल्याचेही त्यांनी आवर्जून नमूद केले.
