मुंबई (वृत्तसंस्था) आपल्या वक्तव्यांमुळे नेहमीच चर्चेत असलेली अभिनेत्री कंगना रनौतला दिंडोशी न्यायालयाने मोठा झटका दिला आहे. कंगनाने खार इथल्या घरात केलेल्या वाढीव बांधकामाला न्यायालयाने नधिकृत असल्याचं सांगितलं आहे. या आदेशाला आव्हान देण्यासाठी न्यायालयाने कंगनाला ६ आठवड्याची वेळ दिली आहे. त्यांनतर पालिका कंनानाने केलेलेल्या अनधिकृत बांधकामाची तोडफोड करु शकते.
दिंडोशी कोर्टाने अवैध बांधकामावर शिक्कामोर्तब करून याचिकाकर्त्या कंगना रणौतला ६ आठवड्यांची मुदत दिली आहे. महापालिकेनंतर आता कोर्टानेही अवैध बांधकामावर शिक्कामोर्तब केल्याने कंगनाच्या अडचणीत वाढ झाली असून बॉलिवूड ‘क्वीन’साठी हा मोठा धक्का मानला जात आहे. कंगनाचा खार पश्चिममधील डी. बी. ब्रिझ इमारतीत एक फ्लॅट आहे. या इमारतीतील एकाच माळ्यावरील तीन फ्लॅटला तिने मर्ज करुन मंजूर आराखड्याव्यतिरिक्त जास्तीची जागा अतिक्रमित केली. कंगनाने तिच्या घरात लॉबी, पॅसेज आणि कॉमन जागा एकमेकांत मर्ज केलेले आहेत. या एकत्रिकरणाचा उल्लेख या मंजूर आराखड्यात नाही. याबाबत पालिकेने कंगनाला २०१८ मध्ये नोटीस पाठवली होती. हेच बांधकात अनधिकृत असल्याचं आता न्यायालयानं सांगितलं आहे. मात्र कंगनाने पालिकेच्या कारवाईपासून वाचण्यासाठी कोर्टाकडून स्थगिती आणली होती. मात्र आता दिंडोशी कोर्टाने हे बांधकाम अवैध असून दीड महिन्यानंतर तुम्ही ते तोडू शकता, असं म्हटलं आहे. दरम्यान, गेल्या काही दिवसांपासून कंगना विरुद्ध राज्य सरकार आणि मुंबई महापालिका हा वाद रंगत आहे. मुंबई महापालिकेने कंगनाच्या कार्यालयाचा अनधिकृत भाग तोडल्यानंतर कंगनाने यंत्रणेवर खरमरीत टीका केली होती. तसंच एकेरी शब्दांत उल्लेख करत मुख्यमंत्री उद्धव ठाकरे यांच्यावरही निशाणा साधला होता.
