लोणार (वृत्तसंस्था) बुलडाणा (Buldhana) जिल्ह्यातील लोणार (Lonar) याठिकाणी एका ३८ वर्षीय व्यक्तीची हत्या केल्याची घटना उघडकीस आली होती. दरम्यान, ही हत्या अनैतिक संबधातून (Murder in immoral relationship) झाल्याची धक्कादायक माहिती समोर आली आहे. कैलास अश्रुबा इंगोले असं हत्या झालेल्या ३८ वर्षीय व्यक्तीचं नाव आहे. या प्रकरणी पोलिसांनी श्याम काशीराम दुधमोगरे या २० वर्षीय तरुणाला अटक केली आहे.
पोलिसांनी दिलेल्या माहितीनुसार, मृत इंगोले यांची ३० वर्षीय पत्नीचे २० वर्षीय आरोपी श्याम सोबत अनैतिक प्रेमसंबंध सुरू होते. मागील बऱ्याच दिवसांपासून दोघांत प्रेमसंबंध सुरू होते. पण मृत कैलास हा अनैतिक संबंधात अडथळा ठरत होता. यातूनच आरोपी श्यामने कैलास यांची हत्या केल्याचा संशय पोलिसांना आहे. ५ मार्च रोजी मृत कैलास इंगोले यांचा एका शेतात मृतदेह आढळला होता. या घटनेची माहिती मिळाल्यानंतर लोणार पोलिसांनी अकस्मिक मृत्यूची नोंद केली होती. पण मयताच्या डोक्यावर मारहाणीचे काही व्रण आढळून आले. त्यामुळे त्यांची हत्या झाली असावी, असा संशय पोलिसांना आला. त्यानुसार पोलिसांनी अधिक तपास केला असता, मृत कैलास यांच्या पत्नीचं गावातील एका २० वर्षीय तरुणासोबत अनैतिक प्रेमसंबंध सुरू असल्याची माहिती मिळाली.
दोघांच्या प्रेमात कैलास अडसर ठरत असल्यानं हा खुनाचा प्रकार घडल्याचा आरोप मयताच्या बहिणीनं केला. या माहितीच्या आधारे पोलिसांनी संशयित आरोपी प्रियकर श्यामला अटक केली. पोलिसांनी केलेल्या प्राथमिक चौकशीत आरोपीनं मयताच्या पत्नीसोबत आपले प्रेमसंबंध असल्याची कबुली दिली आहे. त्यानं हत्या केली की नाही? याबाबत अधिकृत माहिती अद्याप समोर आली नाही. पोलिसांनी खुनाचा गुन्हा दाखल करत आरोपीला अटक केली आहे. गुन्ह्याचा पुढील तपास लोणार पोलीस करत आहेत.
